前日復工出席內地頒獎禮的黎姿，面對記者強顏歡笑，她表示現時攞獎對她來說不太重要，最想家人健康平安，如果弟弟黎嬰快些蘇醒她會更開心，她透露黎嬰剛做完一個腦髓手術，將會做多兩三次手術，要在深切治療部和病房兩邊走。 廣州直擊
黎姿、陳豪和林保怡等前晚在廣州出席粵港十年網娛盛典頒獎禮（得獎名單詳見附表），之後便到大會在中國大飯店舉行的慶功宴，黎姿在高層樂易玲陪同下接受記者訪問，她透露出發前曾到瑪麗醫院探弟弟黎嬰，她說：「攞獎本來好開心，但我心情好矛盾，如果細佬快啲醒番，我會更開心。𠵱家攞獎對我嚟講唔係太重要，屋企人身體健康、平平安安就得。」
「按摩得越多越好」
問黎姿可有如報道所指每天替弟弟按摩？她說：「物理治療師有教我幫細佬按摩，話做得越多越好，我會讀時事新聞同開收音機畀佢聽，佢嘅反應係有時笑有時喊，都識眨眼，但講唔到嘢，佢插住喉出唔到聲。」
黎姿謂胞弟將會做多兩三次手術，她說：「啱啱做咗個關於腦髓嘅小手術，穩定咗先可以再做手術，每次做完手術，佢都會推去ICU（深切治療部），穩定後再推去大房，嚟緊要兩邊走，大家唔好以為佢嘅病有變化。」有傳黎嬰瞎了，黎姿說：「佢右眼有少少傷，另外一隻完全冇事，但唔係外傳要割出嚟，亦唔係外傳咁誇張要割咗個腦。」黎姿透露院方有替黎嬰針灸，至於黎嬰的美容院仍然如常運作，黎姿有時也會幫忙打點。
有傳黎嬰在交通事故中由於沒有扣安全帶，所以沒有保險賠償，黎姿說：「賠償方面未計劃任何嘢，據我所知細佬向來無論做司機定乘客都會扣安全帶，所有嘢交咗畀律師處理，由律師同警方溝通。」醫藥費方面，黎姿說：「都係以香港公民嘅價錢每日100蚊，包括埋做手術各樣費用，我希望以後做多啲嘢回饋社會。」有傳黎姿為了醫藥費而賣身給TVB，她說：「一早賣咗好多年，如果我冇簽呢間公司，都唔知點樣堅強落去。」
陳豪：唔好迫我啦
陳豪被追問和廖碧兒去澳門睇曼聯遭撞破一事，他以「希望今年攞男主角」轉移話題，問到若與廖碧兒一齊攞獎，可會宣佈結婚？他說：「郭晉安都攞咗兩次先結婚，我會以佢為鑑。」記者指他是否不肯承認女友身份，陳豪笑笑口邊行開邊說：「唔好迫我啦！」
採訪、攝影：曾小嘉
