人物：陳海琪
時間：2000年9月
地點：香港電台
經過：曾經喺商台、新城同港台都做過DJ嘅陳海琪，無論去到邊間電台做嘢，都一定有大事發生。除咗94年佢向商台辭職之後即刻跳槽新城，搞到商台發聲明話佢毀約外，00年9月4號晚，海琪幫港台做節目《海琪的天空》，都試過為咗成龍同港台反面，搞到曠工唔返去做節目。
話說當晚海琪搵成龍做嘉賓上節目傾偈，冇諗過通知記者到場採訪，點知港台公關冇知會海琪就叫咗班記者嚟，搞到成龍好唔高興，以為係海琪擺佢上枱，海琪覺得食咗死貓，當晚佢喺節目中一度哽咽咁話：「既然出師不利，不如到此為止。」
為咗呢件事，海琪曾經向有關人士大興問罪之師，但事件擾攘多時唔單止未有結果，海琪仲同高層發生爭執，佢一嬲之下竟然曠工，成兩個星期都唔返電台做節目，要臨時搵鄭子誠等DJ嚟頂替，當年唔少人都覺得海琪咁做實在係小題大做，失去專業精神。雖然當時二台台長周偉材死撐話海琪係突然有事請假，但鄭子誠就踢爆話海琪失蹤已經唔係第一次，對方一失蹤，港台就搵佢頂上。
到01年9月，海琪又喺節目度忽然宣佈離職，原來佢因為節目改革問題同高層鬧翻，所以決定辭職唔做，佢咁突然嘅決定，當然又搞到電台陣腳大亂，但係對港台嚟講，以後就唔使擔心有咁多突發事件發生啦！海琪離開港台後冇開咪，選擇做經理人簽啲樂壇新人，以佢嘅性格，似乎都係做節目適合好多！
本欄逢周一至周六刊出