古天樂早前與甄子丹合作拍攝了一齣動作電影《導火綫》，後者有個「全宇宙最好打」稱號，新片也打正旗號賣武打，本以為古仔經「高人」指點後，也會來個大突破，變身筋肉男瘋狂格鬥一番，但原來他只有捱打的份兒，而且部份捱痛拍下的場面，因送檢時被指過份暴力血腥，最終被迫刪剪。
據知《導火綫》最後一幕會一口氣打足5分鐘，場面極度精采，但這些俱與古天樂無關，因為激烈動作場面都由甄子丹及鄒兆龍包辦，不過古仔仍大嘆打得辛苦，他說：「我個角色係卧底，俾人打嘅多，仲要俾人打跛埋隻腳，有幕戲講鄒兆龍用張凳劈落我個頭度係咁打，打到成面血，雖然係假，但每一下打落嚟都好痛，最慘係場戲送檢時，話過份暴力同血腥，最後都過唔到電檢嗰關剪咗。」
負責演文戲
雖然不必打打殺殺，但古仔在片中另有任務，就是負責文戲，他說：「因為唔想好似淨係得個打字，所以子丹負責打，我集中演戲嗰方面，但都有安排我同子丹對打，佢仲要求我要快同準，打到死咁滯。」
古仔在這數年間戲路的確擴闊了不少，搞笑、動作及愛情輪住試，最近更深得有笑匠之稱的許冠文垂青，公開讚賞之餘，還力邀他合演新戲。成功非偶然，其實古仔曾下過不少苦功，每次接到新劇本後，他都會認真鑽研角色及搜集資料，絕不馬虎。
感激杜琪峯
古仔說：「其實喺近呢兩年間，我發覺自己睇嘅嘢唔同咗，好似喺演一個角色之前，我會做足準備工夫，了解吓個角色係乜性格，最重要係學識點去彈性處理同靈活變通，太死板又唔得，如果冇咗以前喺無綫嘅訓練，又或者杜琪峯嘅劇本，我諗情況會好唔同。」
採訪：魯萍 攝影：林德雄
