目前主力喺香港做模特兒嘅26歲貝安琪（Ankie），前晚連走兩場，先喺中環睇時裝騷，跟住就以嘉賓身份出席一間名店嘅開幕活動，最奇怪嘅就係佢阿媽劉香萍除咗傍住佢出席活動之外，就連阿女約班friend去蒲Dragoni都跟到實。原本着住條黑色低胸裙去活動嘅Ankie，蒲嘅時候換咗套衫，仲着多咗對黑色透視嘅leggings，唔通呢個look先至啱去蒲？
喺凌晨12點半左右Ankie就同一個skinhead外籍男模離開酒吧，問個男仔係咪佢嘅男朋友，Ankie就話：「唔係，大家只係朋友啫。」不過喺臨走時，佢兩個就當住記者面前嚟個goodbyekiss，而Ankie阿媽仲喺側邊望到實，睇嚟二人感情都唔係咁簡單噃！
終於拍荷李活片
至於貝安琪喺活動上話自己𠵱家都賺到錢養阿媽，問佢賺夠錢買樓未？佢就話：「都夠喇，不過自己想賺夠一億先買樓，因為想買間大屋，可以喺十樓以下，有山有靚景，因為自己唔敢住高層，怕火燭走唔切。」
劉香萍就話佢個女終於接拍咗第一部荷李活電影，𠵱家正跟李暉學打功夫，仲有會同一個姓劉嘅香港導演合作，問到係唔係劉偉強，劉香萍就大賣關子唔肯透露。
