黎姿昨日首日復工，出席內地一個頒獎禮，並破例詳談弟弟黎嬰的病況。她指弟弟已有知覺，但未蘇醒，她稱這件事對她來說很艱難，但自己沒資格講辛苦。黎姿透露下月中將復拍《珠光寶氣》，又特別多謝好友蔡少芬以及公司對她的關心和愛錫。 廣州直擊
黎姿胞弟黎嬰自5月發生嚴重車禍後，一直在瑪麗醫院留醫，黎姿也因而暫停所有工作，每日兩次往醫院探望胞弟，昨日是事件後黎姿首日復工，到廣州中山紀念堂出席粵港十年網娛盛典頒獎禮。傍晚時分，紮了馬尾的黎姿身穿低胸花裙行紅地毯，但她臉容略帶憔悴，也有點浮腫，相信是擔憂弟弟病情之故。
感謝蔡少芬關心
黎姿昨破例跟記者詳談弟弟的病況，她眼濕濕地說：「細佬一路進步緊，好多謝瑪麗醫院嘅醫生同護士，令我覺得作為香港居民，交稅交得好值得。」那黎嬰是否已蘇醒？她說：「仲需要一段時間，唔係拍戲，唔會突然間醒番講番嘢，始終係咁嚴重嘅車禍，需要時間康復，我對佢有信心，佢對自己亦有信心。佢未完全醒，係有知覺，仲需要做多幾次手術。」
談到黎萱讚黎姿乖，照顧得細佬很好，對此黎姿說：「係應該嘅，作為屋企嘅一分子，對我嚟講係好艱難，但過程唔係我一個痛苦，我冇資格講辛苦，比我辛苦嘅人更多。」
黎姿透露下月中會全面復工，復拍劇集《珠光寶氣》。至於有指她阻礙該劇進度，黎姿說：「同劇演員唔止係同事，我哋合作過好多套劇，感覺似一家人，係兄弟姊妹，我未聽過劇組有任何怨言。屋企發生不幸嘅事，令套劇多多少少有延遲，我十分抱歉，但佢哋𠵱然好支持我，我收到好多sms同電話問候，特別係蔡少芬，佢第一時間打畀我，之後隔日打畀我，佢係我其中一個小天使，好多謝公司咁愛錫我，上上下下都有好多天使，好彩簽咗間咁好嘅公司TVB，否則會好頭痛。公司幫我好大忙，我會盡我能力拍好套劇。」問黎姿可有被刪減戲份，她謂不清楚，因為之前只收了一半劇本，不知劇情發展如何。
姊姊刷牙才張口
此外，無綫高層樂易玲前晚透露黎嬰原本前日要做手術，黎姿特別要求提前一日，因前日她要返公司開會，樂易玲說：「黎姿堅持要細佬做完手術先復工，佢復工時，會請特護照顧細佬。黎姿𠵱家日日幫佢刷牙按摩，黎嬰知係家姐先肯張開個口，仲有佢雙眼係完整嘅，不過佢一日未清醒，唔知視力得番幾多，𠵱家仲差啲小手術，完成手術就可以將頭骨放回原位，然後做物理治療慢慢康復。」她又透露黎姿經常祈禱，現在奇迹已慢慢出現。
採訪：曾小嘉、林妙萍、胡比
攝影：陳俊強
