最近，有唔少連卡佛敗走上海、北京等言論喺網上流傳，唔通連卡佛主席吳光正真係唔掂？噚日華華見到佢位千金吳宗恩，佢有意無意咁出嚟澄清。
古語有云「置諸死地而後生」，但勢估唔到放洋英格蘭同花旗嘅九龍倉（004）主席吳光正千金吳宗恩，都識得呢啲古老嘢。佢話集團經已執晒所有喺內地以合營方式經營嘅連卡佛，跟住會喺北京開番間全盤由集團「揸fit」嘅連卡佛，實行重新上路！
呢位芳齡30，喺03年開始將157年歷史嘅連卡佛年輕化嘅總舵手，噚日向華華同行家講，連卡佛選擇將所有合營店關閉，主要原因係，佢哋認為今時今日以合營店形式經營，已經不合時宜。咁做，可以有更大嘅自主度，做得更好喎！
新生店北京開幕
身為連卡佛總裁嘅吳宗恩話，喺10月開幕嘅「新生」北京連卡佛，佔地8萬平方呎，投資額高達3億銀，位於四季匯商場入面。佢仲話，為要令北京分店服務水平直追香港，每名員工都要參加數百小時嘅訓練，英語更係必修嘅科目㖭！
呢位嬌滴滴嘅吳宗恩，好雄心壯志咁話，集團喺北京企穩陣腳之後，會喺未來五年，同樣以全資擁有自營的形式，相繼進入上海同澳門等多個城市，估計新店舖嘅面積，將會介乎8萬至12萬平方呎，似乎胸有成竹。不過只可以講住咁多，暫時唔可以講得太具體喎！
往績一樣唔失禮
睇完前景，咁連卡佛往績又點呢？吳宗恩話，連同旗下上市公司Joyce（647）在內，07至08年度總營業額將超過78億銀，舊年投資額就達20億銀，暫時仲未有上市計劃。乖乖囡做嘢手起刀落，短短幾年就有咁嘅成績，睇嚟老竇吳光正好快就可以唞唞啦。
[email protected]