澳洲療養院有隻靈貓，當知道有人快要魂歸天國，就會跳上佢張床。香港有冇靈貓或靈狗華華唔知，但噚日就發現有個人仲勁過靈貓，佢就係坐喺國金中心二期頂樓嘅金管局總裁任志剛。
任總嗦一嗦，全球金融市場動向都喺佢手。噚日任總喺佢個專欄《觀點》入面，話自己負責金融監管，特別容易杞人憂天，最近總係憂心忡忡。
呢頭憂心嗰頭跌市
佢喺文章最後講出憂心嘅原因，原來佢關注套息交易（carrytrade）活動對金融體系嘅影響。嘿，呢篇專欄出咗唔夠半日，噚晚歐洲各主要股市大跌，美股昨晚開市亦急跌逾百點，就係因為日圓套息交易大規模平倉，令到歐美股市急挫。問你服唔服！
任總又好似招財貓咁，佢主理嘅外滙基金，受惠6月股市造好，上半年大賺470億，以上半年收益計係歷來第二高。所以佢講嘅意見，都值得大家揣摩一下。