日本前國寶中田英壽將會參加呢個月29日嘅日本參議員選舉，一個唔覺意好似長毛咁，做咗尊貴嘅議員，大家到時就要改口叫中田議員喇！
中田掛靴一年期間遊遍全世界，我求大俠一路以為佢邊做善事邊媾女，估唔到𠵱家仲玩埋政治㖭！不過佢今次唔似玩票性質，政綱仲偉大過當年長毛多多聲，包括空氣污染、糧食問題及地區矛盾等等國內外問題，唔係淨係識瞓街抬棺材咁簡單。
參政非講玩
中田套拉票廣告片亦出咗街，仲拍得好有水準。題目係「Takeaction！7.29（7.29，投我一票！）」（ http://www.youtube.com/watch?v=hqKJ8tI_5JM），內容包括濫伐樹木、貧窮、空氣污染等片段，中田原本俾人遮住對眼，之後一隻隻手攞開，寓意中田要開始做嘢！
從參選理念到宣傳，可見中田今次真係唔講得笑，起碼佢去過歐洲踢波，係典型國際人，又略懂意大利文、英文，行出嚟邊個唔識「Nakata」？加埋日本年輕一代都好buy中田，所以我求大俠睇好佢當選。
見慣大場面
從政好講危機處理同厚面皮，中田縱橫球壇多年，可謂見慣大場面。好似佢嚟親香港同女星幽會，都斷正俾狗仔隊影到，但每次都夠淡定，永冇話好似某前高官驚青到通街躲藏；淨係呢啲處變不驚嘅能力，就知佢係一流政治人才啦！