港股又創新高，恒指升107點，H指仲勁，升160點，成交又逼近1000億元，上升股（唔計認股證）接近600隻。
中資股氣勢如虹，連少數未郁過嘅大落後股亦開始發力，呢類沉咗咁耐嘅股份，一有資金埋位，唔好話睇齊其他升幅以倍計嘅強勢股，就算只係升5成，可能一兩個禮拜內就到位，好和味。
今日推介銀建國際（171）。兩年前，股價2.40元，噚日2.33元，其間有上有落，但走唔出1.80元至2.60元範圍，兩年長時間，冇升過。銀建係實力紅籌股，往績PE8.4倍，同其他PE十幾二十倍嘅紅籌股比較，確係極度偏低，股價就算升上3元至3.50元，仍然係好吸引。
今年5月底，銀建曾升見2.57元，但彈唔起，又反覆落番2.20元水平，呢輪中資股升勢火紅火綠，銀建到噚日卒之有異動，高收2.33元，升6仙，成交亦大增1倍至4400多萬股，今次以大成交而衝破下降軌，且拋離3條短期平均線，MACD亦同時出現入貨訊號，一衝破2.40元，中期上升大浪即可確認，2.60元係長達兩年的徘徊區頂部，可能要停一停，但整固後再衝，照度上去，目標係3.40元。
大成交破降軌
銀建業務多元化，主要從事中國基建、原油儲存、碼頭天然氣管道、地產發展、物業和證券投資，以及處理不良資產等，中國經濟蓬勃發展，銀建瓣瓣業務都受惠，其潛力一被市場發掘，股價就會有脫胎換骨嘅表現。
遠東發展（035）同中信1616（1883）在早個禮拜前推介過，遠展走勢已出現突破，而中信1616亦蓄勢待發，可繼續持有。
遠東收3.64元，升0.15元，升幅4.3%，衝破今年以來所形成的複式頭肩底頸線阻力，短期上升目標指向4.20元。遠展剛宣佈07年度（3月年結）業績，盈利5.38億元，升60%，但上海加州花園銷售延至今年才入賬，盈利會再大增。
中信1616收3.44元，升6仙，大圓底頂部阻力3.50元，一衝破，即可向量度上升目標4元推進，可追入。