玩具股呢排動作多多，合俊（2700）趁熱買銀礦，彩星（635）遞表分拆「忍者龜」本業，過去個幾月炒高近2.63倍嘅龍昌（348），忽然喺業績公佈前夕發盈利預警。華華噚日捉住龍昌嘅執董王子安（圖）問點解，佢話美國單併購官司要撥備4800萬港紙，肯定拖累全年轉盈為虧，呢個風險雖則舊年尾都講過，但見公司股價升得咁勁，點都要發通告提醒小股東。聽落又幾細心，只係點解炒起咗先發盈警呢？
講番未來發展，王子安話會搞多啲智能玩具，佢隨手拎起呢隻識跳HipHop嘅機械人，每隻盛惠8000蚊，佢話會隨件附送教學光碟，激發小朋友深度思考。之不過，有幾多嗲哋媽咪買得起先？
程志遠攝