炎炎夏日，唔一定要去泳灘消暑，大可效法台灣組合飛輪海兩位成員炎亞綸同汪東城，去廸士尼玩機動遊戲。佢哋噚日一早由台灣嚟香港，幾十個fans聞風而至，喺機場接完機又去主題公園等。
炎亞綸同汪東城係幫電視台拍喺樂園玩嘅片，佢哋先坐巴士同米奇、米妮喺樂園巡遊，然後霸定位置等全新嘅巡遊表演，佢哋嘅fans就坐對面。炎亞綸同汪東城為咗解悶，不時向對面嘅fans送上飛吻，引得fans不時尖叫，佢哋仲有幸同灰姑娘、愛麗絲兩位靚女卡通人物握手，艷福不淺。
吳尊眼傷好轉
當汪東城同炎亞綸玩「UFO地帶」時，汪東城企嘅位置啱啱噴水，被水淋到成隻落湯雞咁。至於冇嚟香港嘅另外兩個成員吳尊同辰亦儒就喺台灣為演員胡宇崴慶祝25歲生日。早排傳出吳尊眼部受傷，噚日佢話：「現在好多了，影迷們不用太擔心。」但好友辰亦儒不忘爆料話：「之前吳尊受傷時，只能戴一邊隱形眼鏡，有次拍戲到很晚，我們一起過馬路，吳尊還要我牽他，搞得我像導盲犬。」吳尊即刻忍唔住話：「拜託，我眼睛受傷還不多照顧我，如果出意外怎麼辦？」
