美國企業排隊派成績表，受惠於部份公司業績勝預期，美股上星期一度衝破14000點關口，究竟網民對美股後市點睇？《華爾街日報》網上版調查發現，有份投票嘅2200名網友中，52%認為美股近期升勢過急、過多。rridgeley話：「我覺得道指好快會回落至13000點樓下，所以最好就係每個月有固定投資，持之以恒，懶理高位定低位，好過成日要費神諗幾時入市。」
近期股市風高浪急，用平均成本法的確係唔錯嘅投資策略。hedwig就話：「我諗未來一兩個星期股市會向下調整，之後先會逐步回升！」
不過，cihlavf認為道指應該仲有排升。LMilam74話：「通常企業嘅業績表現向好，都會刺激公司股價揚升，從而帶動該類企業嘅股價上漲。𠵱家係公司公佈業績期，我估計大部份業績都會比市場預期好，對股市有支持。」
睇往績 九成準
OtisMozzetti話：「就算企業𠵱家表現不濟，佢哋都會想盡辦法去改善盈利，同增加資產嚟討好股東，長遠股價都會反覆向上。」佢仲提醒網友：「唔好忘記明年係大選年。」
有分析指出，自1967年至今，經歷10屆美國總統大選，除咗2000年科網泡沫爆破，股市喺大選前一年都係大升。今年適逢係大選前一年，加上企業間併購活動頻仍，為股市增添動力，所以有唔少投資者都認定──美股升浪可以持續到大選。