內地豬肉價格屢創新高，連帶牛肉都要加價，估唔到𠵱家連月尾必定出場嘅即食麵都要加價，幅度仲要勁過豬肉、牛肉，加幅最高達四成。百物騰貴都是原材料惹的禍。
近年原材料急升，初時只係啲銅、鋼等金屬，後來家家必備嘅糖、油、玉米等糧食都貴到飛起，搞到連製造一個幾毫嘅即食麵成本都急升，其中佔成本18%嘅棕櫚油，每噸由4200人仔升到8000人仔；佔成本30%嘅麵粉，亦由每公斤2.04人仔升到2.16人仔；總成本扯高近兩成。各大即食麵公司點cutcost都只係抵銷2至3%影響，結果世界方便麵協會中國分會事務局出手，統一提價幫補麵商，費事佢哋賣一包蝕一包。
市佔率逾95%嘅10幾家內地即食麵供應商，已經同世界方便麵協會傾掂數，5至6毫嘅中低價麵可以加到7至8毫，1蚊就可以加到1.2人仔，最高加幅達40%，平均加幅20%。參與公司包括日清、統一、康師傅等大牌子，加價之餘，都喺包裝、調味方面下功夫。