上市公司除咗要搞好業務為股東增值之外，風險管理都唔可以忽視。
不過風險諮詢機構甫瀚（Protiviti）最近以問卷形式訪問54間本港上市公司，78%受訪者話，喺辨識同管理潛在風險能力，以及基礎建設上，都唔係「十分有效」，反映本港對風險管理認知未夠深入。
家族生意累事
甫瀚董事總經理兼香港區主管李維剛話，本港辨識同管理潛在風險能力較低，主要因為大部份上市公司都係家族生意，大股東兼任主席、CEO營運總裁等職位，因此風險管理主要由呢啲家族成員做主導。歐美等地嘅上市公司大股東就比較多樣化，包括機構投資者或基金，因此對風險管理要求亦都較高。
甫瀚大中華區主管劉建新就認為，本港公司風險管理職責集中喺行政總裁身上，相反美國就由風險專家主理，仲設立風險管理總裁（ChiefRiskOfficer）一職，佢建議本港可以效法，加強風險管治能力。唔知香港公司願唔願意使多呢筆錢呢？