月初先頂替錢乃驥坐上建銀亞洲CEO寶座嘅馬志文，噚日首次以呢個Title出嚟見記者，一向低調嘅佢，睇怕之後都要多啲出嚟見人。佢噚日就代表阿媽建設銀行（939），出嚟幫手籌款，皆因07年世界夏季特殊奧林匹克運動會係由建行作主辦銀行。
其實建行喺北京已開始咗募捐活動，今次論到香港，連埋香港嘅建行亞洲，佢哋會喺11個城市嘅3000間分行進行大型籌款，今個月去過建銀亞洲嘅話，應該見到分店內多咗個捐款箱。捐錢超過10蚊嘅話，仲可以攞埋由智障畫家畫作印成嘅明信片（圖二）。
馬志文噚日出嚟亦身體力行，搵嚟靚女藝人郭羨妮幫手，即場募捐，自己亦捐埋一份，不過因為一班娛樂及財經攝記包圍住，場面都幾混亂，所以睇唔到馬生捐幾多。總之所有籌得嘅捐款會捐畀特奧，而籌款嘅開支就由建行負責。