近排大陸股市調整唔少，宏調、加息陰霾不散，但都冇打擊新手入市意欲，見到呢班股壇新丁勇字行頭，老手都戥佢哋擔心，忍唔住醒佢哋幾招，忠告有乜股票新手唔好掂。
1.冇大水喉射住嘅
冇基金睇住，單靠散戶力量，牛市時通常都會跟住起哄升；但遇到跌市，就好容易打回原形，甚至屢創新低。
2.飆升之後橫行嘅
你以為佢等突破，其實係莊家靜雞雞出緊貨，出完貨之後隻股就開始大跌。
3.成日俾人炒高嘅
即使嗰啲股票已經大幅回落，都唔好掂，因為你好難知道股票真正嘅價值，接咗只會自尋死路。
4.多股評人推薦嘅
通常股評人成日講嘅股票，走勢都唔錯，咁樣啲散戶先信佢眼光好，到散戶蜂擁買入，好多時啲莊家都會乘機出貨，散戶好容易坐艇。
5.仲未跌到谷底嘅
散戶咪以為股票跌咗好多就應該撈底，其實隻股可能深不見底，最後要止蝕離場，散戶最好都係寧買當頭起。
愛上貓的魚就話：「聽起嚟好似好容易，做起嚟就好難。」盜花草就認為：「炒股最好嘅策略就係，大家賣嘅時候你就入，大家都走去買嘅時候你就沽。」雨葉幽香亦同意：「總之係高拋低買，唔好貪心。」
http://club.city.travel.sohu.com/r-dalian-552983-0-5-0.html
報料站
歡迎提供網上財經趣聞，資料一經採用，酬100元。
請附姓名、電話及電郵地址，交[email protected]