強積金收費貴同埋唔合理嘅地方，華華鄰居金手指同思哲兄都講過唔少，但始終勾唔起廣泛討論，直至消委會早前提咗好多強積金收費過高嘅「證據」出嚟，先引嚟社會關注、市民討論，繼新任財經事務及庫務局局長陳家強幫口，話最好引入多啲強積金產品，多啲競爭就可以降低收費……之後，連積金局新主席范鴻齡都高度重視，咁，代唔代表供咗強積金嘅升斗市民，第日退休可以有啖好食呢？
范鴻齡一上場做積金局主席，大家就有好戲睇，佢要求強積金減低收費，同畀僱員自由選擇強積金；矛頭更直指強積金嘅信託人機構。
俾人話收費貴，香港信託人公會冇理由捱鬧，原來佢哋之前靜雞雞收集咗嚟自各方嘅「罪證」先，到噚日終於反擊，公會主席劉嘉時同華華講開強積金收費時，就逐一加以反駁。
茶餐廳文件 附送咖啡迹
佢話，做強積金信託人未必單單實賺，全港有8成係中小企，僱員人數少於20人，好多中小企都冇電腦，所有文件要用紙張處理，試過有啲茶餐廳僱員嘅供款額，每個月得嗰7個半銀錢，啲文件仲有咖啡迹喺度！佢哋有啲信託人會員，投資喺強積金嘅資訊科技系統，到𠵱家6年多，都仲未回到本。
劉嘉時又話，千祈咪話佢哋工作簡單，由於要負責市民退休後嘅錢，監管尤其嚴格，所以工作特別繁瑣，好似一個僱員嘅戶口可以多達8個，平日又要核對供款、跟進遺漏登記、遺漏供款、供款差異等，又要跟進拖欠供款，提供電話熱線；到提取權益時，又要核實成員係咪65歲，如果提早退休，或死亡、完全失去能力、永久離開香港等等，就要查清有關證明文件；總之就唔易做咁話喎，「我哋唔係搶錢，淨係收錢唔做嘢！」
[email protected]