「我一行出嚟，全世界都頂唔順！」吳耀漢說的是他在《奇謀妙計五福星》中學隱形術脫清光跑來跑去的經典爆笑場面。這一幕，吳耀漢全裸露股，贏盡口碑票房，卻贏不了影帝寶座，吳耀漢雖然失望，但戲院裏震撼無比的笑聲，令他覺得今仗已經贏了。24年後的今天，吳耀漢計劃重拍《五福星》，讓久違了的五福星重出江湖。 撰文：戴彩煥
吳耀漢83年在《奇謀妙計五福星》中一脫成名，他與洪金寶、馮淬帆、秦祥林和岑建勳這次合作引起的化學作用，更在影壇中掀起了一系列《福星》片熱潮。究竟，當日他為何豁出去作全裸演出？吳耀漢笑說：「第一，我唔係女人；第二，我係一個演員，喺嗰場戲有需要。其實拍嗰日，我都有問洪金寶係咪一定要我做，佢話：『我哋度呢場戲好清楚，係只有一個人可以做，就係你，因為你個樣夠戇居。』」
坦蕩蕩拒絕黐膠紙
雖然觀眾在畫面上看不到吳耀漢的重要部位，但他拍攝時卻完全無遮無掩。重提當日拍攝情景，吳耀漢笑到標眼水：「當日我一行出嚟，全世界都頂唔順，攝影師揸住部機笑到手都震埋，NG完又NG，冇一個忍得住笑，結果場戲拍咗一日。其實導演有問我使唔使貼膠紙，但如果又驚呢樣又驚嗰樣，根本冇辦法入到戲，喺蒸氣浴室個個都係咁行嚟行去㗎啦，大家都係男人，唔會覺得尷尬！」
83年憑《奇》片角逐第三屆香港電影金像獎最佳男主角，最終敗於《垂簾聽政》的梁家輝手下，吳耀漢坦言感到失望：「評判似乎覺得做文藝片啲演技先係好啲，冇人知喜劇係最難演，你要去到嗰種內心世界，我演嘅時候，係好超越自己咁多年演繹方式，好有信心覺得自己會贏，你冇畀獎我，我梗係有失望，但我內心世界好充實，因為票房、因為知道觀眾好鍾意呢部戲已經好足夠。」
搞搞震創電視先河
近年流行集體回憶，吳耀漢亦有意拉攏五福星重出江湖：「我哋呢班人再走埋一齊，一定會好過癮，我構思緊一個古仔，大家喺某情況之下再聚埋一齊，希望趁住個個未釘拍咗佢，曾志偉都構思緊搵《五福星》嘅第二代拍一部啦！」
數吳耀漢電視經典之作，不得不提89年他為亞視主持的《吳耀漢搞搞震》，這個香港電視史上第一個玩偷拍整蠱人的節目，因為收視反應熱烈，由原來13集加長到整整一年。記者好奇問當年是真的偷拍還是做「媒」時，吳耀漢笑說：「耐唔耐都有。嗰陣時就算我放工行街食飯，啲人見到我都會以為偷拍緊，問我：『你係唔係整蠱我？個鏡頭喺邊度？』
教嘉龍𠝹女任人寫
吳耀漢兒子吳嘉龍近年挾父親之名晉身影圈，但事業還未打得穩，卻頻頻被傳媒拍得他身邊女伴如走馬燈轉，對於兒子被封「𠝹女王」，吳耀漢有豁達的見解：「佢（吳嘉龍）同我講話成日喺街同人傾兩句又俾人影俾人寫！我話連呢啲都唔寫，你冇新聞㗎啦，所以應該覺得係好事，有新聞吖嘛！其實大把女仔追佢啦！」原來，吳耀漢從沒有教兒子演戲，卻教曉他戀愛道理：「佢啱啱讀完書第一次失戀，猛話好痛苦好痛苦，我話儍嘅，你應該lookforward下一段愛情，唔應該覺得咁悲傷至係！」
人物誌：周梁淑怡提攜入行
現年68歲的吳耀漢，15歲到英國定居，70年與太太Susan（圖）返港開設「蘇珊髮型」，獲熟客周梁淑怡力邀參與無綫《雙星報喜》演出，其後主持《點止咁簡單》後全力進軍影壇，83年主演的《奇謀妙計五福星》為代表作，之後拍了一系列《五福星》、《神勇雙响炮》及《不是寃家不聚頭》等電影，96年退休返回英國後仍不時參與海外電視及電影演出，並於近日英國實驗電影《AnewBeginning》中與吳嘉龍父子兵上陣。
