馮德倫計劃明年3月重拍龍剛版本的《英雄本色》，男主角已定了由劉德華主演，想不到除了華仔對這部戲感興趣外，遠在荷李活的巨星湯告魯斯（TomCruise）都有意開拍英文版，上周馮德倫便專程飛到柏林與他密談合作大計，同場還有靚佬湯的妻子和囡囡，馮德倫更大讚對方沒有架子。
馮德倫繼早年執導的動作喜劇《大佬愛美麗》被美國公司購下西片版權後，早前他與新版超人班頓羅夫（BrandonRouth）也在北京暢遊天安門廣場兼洽談合作大計，想不到一個月後，又有美國公司來敲門，相約他與湯告魯斯（TomCruise）在柏林見面。原來靚佬湯十分重視亞洲市場，特別是中國，他希望能夠加強與亞洲導演合作拍戲。
全新故事
為愛情兄弟鬩牆
現時靚佬湯正於德國柏林拍攝白賴仁辛格（BryanSinger）執導的新片《Valkyrie》，該片監製ChrisLee是馮德倫的好友，在Chris的穿針引線下，上周特別安排了一個飯局讓靚佬湯與馮德倫見面，日前馮德倫說：「今次喺柏林同湯告魯斯見面，感覺上佢真係冇乜架子，個人仲好nice，當Chris話畀佢聽我有一部戲俾美國買咗西片版權之後，佢就問我有冇其他古仔可以傾合作。我話畀佢聽同劉德華出年會拍攝龍剛版嘅《英雄本色》，故事就係全新創作嘅，佢聽完之後介紹咗佢公司一位高層畀我識，叫我將呢部戲繙譯成英文版，睇吓可唔可以合作，返嚟香港後，我已經開始搞緊個英文版劇本，希望盡快可以畀到佢睇。」
馮德倫強調明年3月開拍的《英》片只是保留了龍剛版的片名，故事由他重新創作，他說：「今次故事係環繞兩個由細玩到大、關係親如兄弟嘅一對青年人嘅恩怨情仇，劉德華會演契大佬角色，佢同契細佬都喺江湖打滾，點知細佬為咗愛情同屋企人，竟然出賣大佬。𠵱家細佬角色雖然心目中有理想人選，但因為未簽約，所以唔想講出嚟住。」
馮德倫透露靚佬湯表示曾看過他執導的《精武英雄》，另外他對華仔的電影相當熟悉，記者問在西片版的《英》片中，究竟華仔與湯告魯斯會否有機會合作？他說：「邊度有講到咁深遠，但湯告魯斯話佢都睇過華仔嘅電影作品。」
慈父巨星
湊女應酬一腳踢
馮德倫首次與靚佬湯見面，同場還有其妻子姬蒂荷姆絲（KatieHolmes）與女兒Suri，他指鏡頭下的靚佬湯原來是慈父一名，他笑說：「喺個飯局中，我發現靚佬湯嘅目光幾乎冇離開個寶貝女，而佢個女又好鬼嗲，成日喊住爹哋，搞到個老竇一邊要招呼朋友，一邊要湊女。」
採訪：葉雪
最高蘋嬸
靚佬湯同華仔出晒名係靚仔，分別係靚佬湯做咗老竇，華仔就堅持話自己單身，如果佢哋有機會合作，唔知華仔會唔會畀靚佬湯影響生番個，而且公告世界呢？
蘋果娛樂特派評述員蘋嬸
娛樂資料庫：5路英雄各自精采
電影《英雄本色》自1967年由龍剛執導的黑白版本上映以來，至明年共有5個不同版本。
年份：1967
導演：龍剛
演員：謝賢、王偉、嘉玲和陳齊頌
劇情：講述謝賢跟王偉兩兄弟的情誼，謝賢為釋囚，被黑社會頭子石堅威迫再入黑道，為勢所迫無法回頭
年份：1986
導演：吳宇森
演員：狄龍、周潤發和張國榮
劇情：警匪對立故事，釋囚狄龍跟警察張國榮因黑白兩道對立而兄弟不和，周潤發更憑片中的Mark哥角色在電影界走紅
年份：1994
導演：王晶
演員：鄭伊健、劉青雲及王敏德
劇情：《新英雄本色》故事講述初出茅廬的劉青雲與名震江湖的鄭伊健是生死之交，後鄭伊健被陷害，劉青雲助他報仇
年份：2008
導演：馮德倫
演員：劉德華
劇情：翻拍龍剛執導的版本，保留兄弟情主線，但故事全新創作。
年份：2008
導演：鄭胤澈
演員：張東健、古天樂及Rain
劇情：翻拍吳宇森執導版本
資料來源：《蘋果》資料室
