前晚拜仁慕尼黑喺德聯盃首圈大炒雲達不來梅4:1入4強，禮拜三同史特加爭入決賽，但門將簡尼就因為一隻蟲仔而大出洋相，你都咪話唔搞笑。
話說去到比賽後半段，拜仁嘅「大猩猩」龍門簡尼突然周身fing，又猛咁撥件衫同埋搞個膊頭，十足十玩神打咁。我求大俠初時以為佢俾球迷掟入嘅硬物擊中，但慢鏡重播唔見有嘢掟入場，再睇真啲，先知佢應該係有隻昆蟲飛咗入佢件衫。咁又唔怪得佢咁騰雞，事關佢隊友「小豬」舒韋恩史廸加早排因膝傷唞咗幾個月，有傳就係因為俾毒蚊咬所致。
「小豬」俾蚊咬要長唞
好彩簡尼喺球會軍醫幫手底下，整走咗隻昆蟲，經檢查後亦冇乜事，最後可以入番場比賽。查實有時睇波影到啲近鏡，周不時會見到啲蟲仔喺度飛嚟飛去，𠵱家個世界唔同晒，多咗好多新病毒，睇嚟啲球員真係要提防呢啲「不速之客」。
講番拜仁對不來梅場波，拜仁教練希斯菲特變陣，唔用踢開嘅4-4-2陣式，排咗個4-2-3-1陣式出嚟，陣中3個進攻中場咸美艾天托普、列貝利同埋舒韋恩史廸加，以及左右兩閘馬素贊臣同埋拿姆，踢到好似搶錢咁，攻到不來梅有氣冇得唞。
至於倒戈對不來梅嘅高路斯雖則有個助攻，但整體表現就俾拜仁其他幾個新兵好似係列貝利、咸美艾天托普同馬素贊臣等比下去，我求大俠擔心如果佢哋喺今季踢單箭頭，而高路斯嘅狀態又操唔起嘅話，正選位隨時落喺意大利首席前鋒東尼手上。話時話，高路斯離開不來梅係想有更好發展，到頭來隨時得不償失。