𠵱家西部通道通咗車之後，好多住屯門嘅居民都貪平，由屯門碼頭搭巴士去蛇口玩番一日半日都唔錯，單程巴士費去到深圳灣口岸只需11蚊，仲平過由屯門搭巴士出灣仔。𠵱家開咗成年、位於屯門碼頭嘅香港西北航運快線有限公司嘅航班，本來已經拍晒烏蠅，冇乜人幫襯。上個月開咗由屯門去蛇口嘅航班，每日只有兩班，原來票價為60蚊，以為有轉機，可以吸引到啲愛北上玩嘅居民乘搭，點知又遇上收費勁平嘅巴士！
小妹最近見到，船公司都即刻見招拆招，大幅減價（圖），成人單程票原價為60蚊，由本月7日開始減價至38蚊；10人以上嘅團體票每人更只需28蚊，實行一齊鬥平，力挽狂瀾。小妹就覺得，呢啲巴士、航運公司最好繼續鬥割喉鬥減價，最後就益晒啲消費者！
逢周一至周四刊出