稻香酒樓有幾旺係人都知，無論早午晚市，門口都係人頭湧湧，不過稻香（573）嘅股價表現同生意就相差好遠。上個月底掛牌以嚟，股價已經跌穿招股價2%，上星期收3.12元。suenhk話：「IPO中咗一手，家吓股價喺水底吸緊氧氣吊緊命，各位小股東多啲去稻香擺酒同打邊爐支持吓，將股價滾旺！」
送鮑魚平息不滿
V3RX2000就認為：「稻香最好就請班小股東每人食隻鮑魚，平息吓佢哋嘅不滿仲好！」而殺出血路就唔貪心：「佢返到家鄉已經還心願，到時即刻放鬼咗佢。」Blue_Cookie就覺得：「都唔知班保薦人點做嘢，搞到股價表現咁差。」
DBP對酒樓股前景就唔係咁睇好：「家吓飲食業競爭咁大，做大快活（052）都仲話可以推中、美、法、日唔同食物做噱頭，做酒樓又唔得。」愛錶之友好同意：「再加埋近排食物來貨價貴咗，豬肉係咁升，但賣價又唔敢點加，嚟緊飲食業真係不利居多！」Drymonkeyhk仲話：「買酒樓股不如買味千（538）好過喇！」點解？佢冇解釋噃！
http://www18.discuss.com.hk/viewthread.php?tid=4791248&highlight=%BD%5C_%AD%BB