黃金集團（1031）連續兩支大陽燭，由低位0.60元抽上0.84元，大升40%，上周五成交9700多萬股，噚日再大增到1.76億股。升勢咁勁，又有大成交配合，必有大動作醞釀。
黃金集團在0.40元水平靜咗好耐，今年3月底終於發力，個多月時間內急衝上0.98元，之後調整兩個多月，近日升勢再起，以大成交突破下降軌及幾條平均線，起步嘅升勢比上一個浪仲勁，未來一兩日唔排除會回一回再上，一篤穿0.98元嘅高位阻力，初步上升目標係1.20元。
在股價調整期間，大股東朱太曾多次增持，由6月18日到7月11日，一共11次，合共購入3354萬股，平均價由0.69元至0.60元不等，令持股量增至42%，大股東對公司前景好有信心，更唔排除會有令人意想不到嘅大動作。因此，股價若出現調整，正係低吸大好機會，中線亦唔排除會有意想不到嘅收穫。
另外一隻走勢隨時會破位而上嘅係中國木業（269），噚日收0.38元，升7%，成交4.5億股，動力亦開始轉強。
中木動力開始轉強
由6月開始，中國木業在0.27元至0.39元間上落，形成長方形徘徊區，噚日高收，九成機會破位而上，若成交超過5億股，升勢即確認，目標直指向0.51元。
中國木業有名叫，主力係做林木業，另亦進軍能源業及天然資源市場業務。轉型林木業的「大阿哥」中國林大（910），呢一輪係咁升，噚日衝上2.53元後回收2.51元，升幅7.2%，今次在2.30元水平整固後再上，照度上去，目標係3元。中國林大現時已成為基金股，芬佬看好林木業前景，中國木業有機會成為第2隻。
中國木業現時已收購兩個林場，都係在南美洲圭亞那，一個係在國家森林，總佔地16.4萬公頃，公司佔51%，獨立特許測量師估值24.18億元；另一個係GarnerForest，佔地9.27萬公頃，全資擁有，估值不少於14.7億元。集團收購林業只係起步階段，未來會繼續擴大版圖，可看高一線。