大作家倪匡寫咗咁多本科幻小說《衛斯理》，最大特色唔係主角有型有款，而係每當個古仔發展到唔知可以點收科，倪老大就有理冇理入晒外星人數，乜嘢都老屈係外星人做。唔通佢同外星人好friend到打band？究竟佢怕唔怕寫得唔好，會俾外星人追斬？倪老大噚日再度現身書展做嘉賓，向五百幾個衛斯理迷揭開佢同外星人嘅關係之謎。
倪老大一直相信有外星人存在，皆因個宇宙咁大，咁多星球，既然地球有高等生物，其他星球都應該唔會例外。為咗揭開外星人嘅神秘面紗，倪老大試過有段時間，晚晚走上天台癡癡地等，諗住可以昅到UFO或者ET，同佢哋交流吓創作心得。結果係點？倪老大話梗係食白果，見地球人就見得多！如果倪老大同外星人做到朋友，真係唔驚冇嘢寫。
quota用盡寫唔出
《衛斯理》小說嘅另一個特色，就係不時提到靈魂出竅，倪匡都信呢家嘢，但係由於中國古書始終講唔清楚點先做到，倪老大試極都唔成功。
八方相信如果K仔（氯胺酮）早多幾十年出現，倪老大就可以體驗到呢種滋味。不過諗落K仔害人都係咪試。倪老大寫咗咁多書，佢話當年寫作就好似唔知俾乜嘢上身咁，一坐喺位就有靈感，家陣寫作quota用盡，就算寫三百字都好辛苦，好似小學生作文咁，寫極都寫唔出。
反問新抱茶好飲咩
唔知係咪飲得養命酒多，倪老大成72歲人依然精力充沛，轉數極高。喺個幾鐘嘅講座裏面，唔單止絕冇爛gag，仲不停爆出金句。主持問佢周慧敏如果拍電影做白素掂唔掂，倪老大就話連舒淇都得，點解周慧敏唔得呀？咁樣讚人讚到出口，唔通倪老大好恨飲新抱茶？點知佢仲抵死，反問主持乜新抱茶好好飲咩？咪又係杯茶。
除咗寫《衛斯理》外，倪匡仲有段時間幫過金庸寫《天龍八部》，當時金庸叫佢唔可以整死故事內任何一個主角，點知倪老大就玩嘢，寫到女主角阿紫盲咗眼。倪老大噚日再提起呢段往事，仲好得戚咁話，當年查大俠問佢做乜咁大整蠱，佢就振振有詞咁話，武俠小說打打殺殺梗有死傷，真係吹佢唔脹。
唔講唔知，原來𠵱家公共圖書館10本最多人借嘅書當中，有6本係倪匡嘅作品。倪老大聽到之後反而擔心，人人都借佢啲書，會唔會冇人去買？仲笑笑口話圖書館借書，會唔會侵犯版權。