港股日日破頂創新高，每日成交吓吓超過800億，證券行自然水漲船高，賺到笑。港資龍頭行大福證券就與員工分享成果，該行營運總監李耀榮噚日話，除咗經紀之外，所有員工平均可獲發一個月中期花紅。
佢哋今年生意比舊年好，尤其多咗大陸客。該行舊年都有派中期花紅，但最多都係得四分三個月糧，今年就平均派一個月，部份仲有兩個月㖭。
至於點解中堅分子嘅經紀冇份，李總監話，佢哋收佣都收到手軟，自然唔恨用底薪計嘅花紅。
2000億交投都頂得住
早排大市成交試過破千億，部份證券行以至銀行，都死機或勁窒，大福CEO黃紹開就話，佢哋完全冇影響，負責網上交易嘅阿頭，更拍心口話，半年前系統升級後，就算大市每日2000億交投，用該行上網買賣都noproblem。
嘩，講到咁勁，下次成交再破紀錄時，華華真係要睇吓佢哋係咪咁犀利先。