加息直接影響股市表現，除咗係中、港股民關心嘅課題外，內地嘅存戶都好緊張，根據過往經驗，佢哋通常會喺加息之後嗰日，去到銀行排隊搞轉存，乜嘢係轉存？即係將未到期嘅定期存款，改為按新利率再做新嘅定期。中央上星期五使出加息及減利息稅兩招組合拳，其中加息喺星期六即刻生效，但以上海為例，就冇出現轉存熱潮，反而出現「更改房貸合同熱、存款轉存冷」嘅有趣現象。
據內地報章講，今次去銀行排隊轉存嘅人少咗，原因之一，係佢哋嘅定存已經有一定時間，轉存後可能會得不償失，因為存入嘅時間越短，轉存先至會越化算，報章又幫讀者計埋數，1、2、3、5年期嘅定期存款，合理轉存期分別係37天、60天、74天和109天，咁即係話，如果舊有定存嘅日子，已經超過合理轉存期，轉存之後利息收益未必會增加。有啲銀行職員話，近期股市仲好旺，加息未必會即時吸引到投資者將資金存回銀行。
9月再加息？
另外，今次銀行排隊人龍少咗嘅另一個原因，係利息稅會喺8月15日，由20%降至5%，即係話，7月21日至8月15日期間，利息稅會收20%，因此部份存戶延遲搞轉存，賺多幾個禮拜利息。
雖然轉存嘅人唔多，但係喺上個星期六去更改按揭合同嘅人就唔少嘞，上海多數銀行嘅個人貸款中心員工都要開OT，唔少按揭客戶去銀行更改按揭合同，將調息方式由按月調息嘅條款，改為按年調息，又或者將浮息改為固定利率，希望趁未再有下一輪加息之前，趕搭定息按揭嘅「尾班車」，鎖定利息開支。
講開又講，人行今年加咗三次息，每次都係喺月中之後出手，而且每隔兩個月加一次（3月、5月、7月），咁計落去，下次加息會唔會係9月呢？
[email protected]