上個禮拜國內公佈咗GDP同通脹數據之後，連街口阿伯都知道好快會有宏調措施，跟住嗰日收市後，就公佈加息同減存款利息稅，措施相對溫和，但呢啲係事後先知，國內股市同港股禮拜五就已經炒咗上去，即係話大戶係預咗有宏調措施出台都冇有怕，其實仲有一點好支持呢個睇法，加息同減存款利息稅對保險股有利係人都知，同樣加息不利地產股都係基本知識，但上禮拜五國內地產股就升到癲，炒上嘅勢已經開咗頭，今日應該掃得更勁。
花旗股市跌百幾點，使唔使驚？花旗股市周線圖待變，應該可以靠穩，港股同國內股市部署咗炒上，應該可以繼續去，今日撐住個市嘅應該係國壽（2628）、平保（2318）同中移動（941），炒升幅大啲嘅可以博中財險（2328）。
財險C輪9586：財險上禮拜五收7.07元，收市前掃貨嗰段相當勇猛，好狠，成交急增，睇9元，可以買啲財險C輪9586，隻輪報收1.40元，槓桿率5.1倍（有效3.9倍），正股升上9元，9586應該喺3.10元樓上，就算升到8.50元，都應該唔會低過2.63元，正股跌穿6.60元止蝕。