4月旋風訪港、揚言「投資中國冇上限」嘅「中東股神」沙地阿拉伯王子阿爾瓦利德（Al-WaleedbinTalal），密謀喺經濟增長高達11%嘅中國掘金，除咗密密投資H股之外，下一步應該係投資內地酒店。
根據阿拉伯傳媒報道，沙地王子控股嘅上市公司KHI行政總裁ArmadZok曾經話過，未來3至5年，將會喺內地發展10至15家酒店，主要針對二、三線城市，仲諗住喺酒店隔籬發展寫字樓、商場同住宅，實行一站式發展，賺到盡為止。
沙地王子已先後收購嘅瑞士酒店品牌同埋加拿大四季酒店集團，加上今個月用4.5億港銀收購嘅昆山商貿酒店，可見佢發展酒店業務嘅精心部署。
雖然沙地王子曾講過，旗下投資公司已預留78億港銀，喺未來5年投資亞洲。
但係沙地王子掃3隻H股，閒閒地都用咗超過200億港銀，加上特別聲明「投資中國冇上限」，內地又遍地黃金，睇嚟實際投資內地嘅金額應該唔止咁少喎。