結好控股（064）先舊後新配售4.2億股，每股0.75元，集資3億元作營運。配售前，結好收市0.82元，上周五配售後股價呈強，最高搶上0.89元，收0.86元，仲升4仙，成交6億股，扣除配售之數，成交1.8億股，好明顯係有大戶在大手吸納，雖有獲利回吐沽盤，依然食晒。
港股進入大時代，證券業形勢大好，好多證券經紀公司嘅股價都已大升特升，最突出嘅係新鴻基公司（086），股價在短短9日內，由7.25元衝上13元，累積升幅80%；但結好冇點升過，論PE同P/B，都係佢最低，睇配售後升勢，大戶資金應已埋位，一發力追落後，好易升一個開。
結好做股票經紀同貸款業務，另外擁有澳門金都酒店45%權益，前者業務發展得好迅速，後者亦有穩定而有增長前景嘅盈利保證。睇番07年度（3月年結）盤數，營業額2.13億元，升41.4%，盈利1.8億元，大升200%，每股盈利（加權計）15.8仙，升39.1%，往績PE5.4倍。
業績可維持高增長
現年度，結好業績會更勁，淨係睇港股，日日成交800至千多億元，而去年度平均係400億元，佣金收入好可觀，估計會有一個double；另外，去年度新開始的放債業務，分部盈利有1530萬元，大增兩倍，現年度保守估計起碼有3000萬元。乘着中央放寬QDII嘅勢頭，結好已作好部署，進軍內地市場，包括在深圳及中國東北地區開設經紀業務分行，將公司業務向北伸延，最新消息係結好已經同內地一家證券公司傾緊合作事宜，雖然係在初步階段，但雙方已有默契，成事機會好大，呢個消息一宣佈，會好具爆炸性，亦會推動大落後嘅股價向上急衝。
現年度，估計結好盈利可上升40%至2.5億元，每股盈利（全面攤薄計）係11.8仙，以仍係低於同業的12倍PE計，短期股價已可見1.40元；中港兩地股市繼續好景，結好上升目標更可達1.80元，現時上車，可賺6成至1倍。