呢個世界搵食真係艱難，連世界級球星美斯亦唔例外；佢周日出席深圳一個遊戲節目，居然受到內地「騎呢」女星當眾騷擾，希望小小年紀嘅佢，唔好因此而留下陰影啦！
唔會娶中國女人
深圳係美斯中國之行最後一站，當晚佢獲邀擔任當地《殘酷一叮》遊戲節目嘉賓，點知同場另一嘉賓係國內呢期好紅嘅奇女子楊二車娜姆（下稱楊二）。大件事！呢位30幾歲嘅女子一見到血氣方剛嘅美斯，即刻要求佢喺件衫嘅胸口位置簽名留念。
節目開始後，楊二繼續騷擾美斯，不斷問美斯仔覺得中國女人靚唔靚，仲要美斯教佢用西班牙講「靚仔」，簡直係性騷擾！最後楊二仲厚面皮到問呢位球星會唔會娶中國女人做老婆，成晚面紅紅嘅美斯即刻話：「唔會！」之後就兜番話自己仲細，未諗住娶老婆。
原來，呢位楊二係摩梭人，來自有「女兒國」之稱嘅四川瀘沽湖，曾經加入中國民族歌舞團，先後去過日本、歐洲等地遊歷；佢97年起開始寫書寫專欄，之前因為喺電視節目言論出位而成名。所以，呢次贊助商咁樣安排，簡直係整蠱美斯啫！
所以呢，連美斯啲咁出名同有錢嘅，都要為銀紙而啞忍性騷擾，你話幾悲哀呢？不過，我求大俠最希望入世未深嘅美斯，唔好因為咁而怕咗中國，尤其係中國女性，因為唔係個個都好似楊二咁癲狂嘅！