昨日港股好威，升咗73點收市，係先低後高拗腰高收嗰隻，不過，如果唔係上禮拜五花旗股市唔生性，港股昨日應該可以勁升幾百點。唔緊要，昨日升得少，今日可以補番數。花旗股市昨晚如果反彈，今日港股淡友好大機會俾人挾多鋪。
個市咁硬淨，買乜嘢股好？大行好似喺度煲緊啲地產股，可以開始留意吓，不過，大路穩陣兼有值博率嘅，都係「六行三保」，「三保」受惠於加息同減利息稅，強勢可以繼續，至於「六行」，強勢股就有兩隻，一隻係工行（1398），另一隻係建行（939）。滙控（005）唔係好掂，暫時忍手。
國壽C輪9074：國壽（2628）昨收31.40元，股價早幾日試咗條20日線即刻彈高，其實走勢好靚，昨日應該可以爆上，但係好似有啲「壓價收貨」嘅活動，阻慢咗升勢，炒上會試36元同38元，人哋收集，大家都可以買，可以諗吓國壽C輪9074，昨收42仙，槓桿率7.5倍（有效4.9倍），對冲值0.65，正股升上36元，9074應該喺76仙樓上，正股升上38元，隻輪應該唔會低過93仙，國壽條20線（29.70元）支持力好強，可以做止蝕位。