都唔明，一樣係烤肉，點解韓國燒烤可以畀一百蚊食到你飽，日式烤肉就要幾百蚊先得嗰幾片肉？到最近，謎團終於解開，最大原因係用料唔同，好似剛開張的由月燒肉居酒屋，除少有地選上最貴的日本神戶和牛同刁鑽牛內臟之外，還特別用上日本貴價花麻石幫燒烤配料保濕去脂，咁講究，畀多一、二百蚊都心甘情願。
記者：甘露露
攝影：梁細權、林栢鈞
Model：DaDa
係，我知道日式燒肉店已經唔係咩新發現，日式居酒屋更加係陳年舊事；但如果我說，今次介紹呢間唔單止係日式燒肉店crossover居酒屋，而係專揀刁鑽的牛部位以饗食客，咁係咪有番晒興趣呢？話明「刁鑽」，當然唔係牛鞭牛波子呢啲普通料，而係香港較少食到嘅牛內臟，好似牛心、牛胃、牛仔肝、牛肚，燒烤後下酒特別香，是日本人到燒肉店必食首選。
「其中一位老闆係日本人，在日本已經開有三間燒肉店，做燒肉店已經有30幾年經驗，佢最了解日本人口味，日本人去燒肉店最鍾意食牛內臟，所以佢將呢個飲食文化帶嚟香港，而且大部份食材都係由日本運嚟，夠晒正宗。」餐廳經理Stanley表示。
神戶頂級和牛「雪花」入口即溶
不過，講真，內臟唔係人人「受得」，好彩老闆醒目，從日本購入神戶最頂級的和牛同鹿兒島和牛。日本和牛出晒名齋嘆唔使做，仲有專人服侍飲啤酒、聽音樂兼「麥沙池」，所以脂肪多過人之餘，肉質又特別鮮嫩無渣，一片片紅白分明，油花分佈有如雪花的和牛肉，燒香後，油脂甘美豐腴，食一塊，口腔那股aftertaste令人回味。嫌神戶牛身價過貴，可選鹿兒島A5和牛（$168），肉質嫩滑得來較重口感，油脂分佈雖然不及神戶多，但牛味較重，同樣值得一試。
日本花麻石消脂保濕
有靚料無個靚爐，嘥料！老闆深明此道，特別找人度身訂做烤爐，爐頭連枱一張就要八萬蚊，特製爐頭的好處是火力猛得來又夠集中，加上爐邊裝有通風系統，燒肉時的濃煙會即時被抽走，唔怕食到一身烤肉味。另外又從日本購入大量花麻石，放在爐中再加入水，在燒肉時，花麻石不但有助傳熱，更重要是能夠吸走肉類燒烤時釋出的油份，而蒸發上來的水份則可以令燒出來的肉更濕潤，肉汁得以保存，肉質入口更鮮嫩，唔會亁到變柴皮！
神戶牛岩鹽燒 $338
最頂級的A5神戶牛，佈滿均勻油花，輕輕燒至5成熟，豐腴甘香，入口即化，食後口腔還有陣陣餘香，蘸少少紅酒燒汁吊味便可。
牛胸腹肉 $72
牛胸腹肉選用美國西部最高級的3A牛隻兩邊肋骨部份的嫩肉起骨，牛隻走動得多，運動量大，肌肉較結實，嫩滑得來有嚼勁。
牛內臟盛盒 $88
費事諗，可以叫個牛內臟拼盤，牛肚、牛肝、牛心樣樣齊，牛肚先烹調過，用來燒較爽口。牛肝與豬膶差不多，但質地較嫩滑。
牛心 $42
牛心賣相似紅菜頭，大大塊厚切燒香來食，口感獨特。「咬落去感覺似食爆漿丸，外面爽脆，入面較腍滑，日本人最鍾意用來送酒。」大廚說。
海鮮拼盤 $198
巨型帶子肉厚鮮甜、北海道大蝦肉脆、甲紋魷魚出名肉質冇咁韌且鮮味，鯖魚原條運來才劏，肉質依然鮮甜，大蜆燒過後汁鮮肉嫩，所有材料均由日本運來，認真講究。
韓式泡菜 $25
一般的泡菜會原棵菜醃，但韓籍大廚卻逐塊逐塊菜葉來醃，加上用的是由韓國購入的辣醬和調味料，菜葉入晒味，送飯送燒肉最正。
自家製醬汁
大廚講究得連醬汁都要自家製：
1.日式燒汁：經過自家調配的傳統日式燒汁，味道較濃和鹹，可以用來食燒肉如豚肉。
2.胡麻醋汁：用日式胡麻醬加入５種配料調校過，香濃芝麻味中帶少少酸，配紅肉最適合。
3.紅酒燒汁：用紅酒調配而成，食法較西式，帶點鹹，最好用來配紅肉。
4.練梅醬：味道清香，不太酸，用來配食豚肉可以平衡豚肉的油膩感。
5.柚子汁：柚子汁味道清新，淡淡的酸香中帶微辣，用來配海鮮最佳。
6.朝鮮醬：朝鮮醬似韓國的辣醬，但辣得來較溫和兼帶點甜，可以用來配肉食。
食客講兩句
Nicole：「以前都有食過日式烤肉，但冇呢度咁多奇怪款式揀，我最鍾意食佢個豚肉同牛心，幾特別，環境都坐得幾舒服。」
Michael：「我好鍾意食牛，呢度有和牛食之餘，仲有不同牛嘅部位食，好特別。神戶和牛最好味，坐得都好舒服。」
食店資料
由月燒肉居酒屋（27246780）
地址：尖沙嘴漆咸道57-59號金馬倫中心2樓全層
營業時間：12:00nn至3:00pm、6:00pm至2:00am
座位：80個 付款方法：設加一，惠顧$200或以上接受信用卡
