馬主H喺曼谷請食飯時，一位老友帶埋兩位孖生女到場，呢兩位小女孩，亭亭玉立，講英語唔多流利，想深入啲溝通都唔得，只知道佢兩位讀書成績好好，一位在朱拉隆功大學（頂級名校）讀醫科，一位在朱拉讀藥劑學，都係泰國學生好難入到嘅學科，尤其係朱拉隆功大學㖭。大概虎母無犬女啩，老友亦係朱拉藥劑學學士。孖女話：「學系內女生多過男生，因為泰國男生鍾意打機，有啲仲鍾意埋打交㖭，故此考試成績不如女生。」
咁講法，香港與泰國同樣如此，香港男仔迷頭迷腦咁打機，輸蝕晒。考試、讀書、見工面試均不如女生，十年後中環必由女性統治。香港禁毒專員黃碧兒或有見及此，居然諗出一條「打機殺K」橋，可見女性心思縝密也。禁毒令人諗起美國電影啲中年掃毒神探硬漢，但香港嘅禁毒專員職位似乎係女性專利，你話香港啲女性幾厲害呢。
呢條「打機殺K」計劃就係創製一個「禁毒遊戲」，名稱就係EvilKiller，以打擊K仔（氯胺酮，Ketamine）與E仔（搖頭丸，Ecstasy）為目標。遊戲共有四關，由K魔、E魔設下重重關卡，主角以無比勇氣，勇闖毒龍潭，破盡四關殺E魔K魔，勇救受兩魔控制、在毒海浮沉嘅少男少女。主角可化身做俊男艾力或者美少女Sheila，喺酒吧配對E仔、K仔真身，再到舞池與K仔化身鬥跳舞，過關到最後就與E仔K仔嘅大佬──食腦魔正面交鋒。
聽落好似幾刺激，香港男仔橫掂咁鍾意打機咯，不妨試打EvilKiller，橫掃E仔K仔，為民除害兼提醒自己不可食搖頭丸與索K。禁毒處與Planet3及和記環訊網站www.hgc.com.hk合作，可免費下載電腦版或3G手機遊戲版。
左丁山唔識打機，唔敢講EvilKiller好唔好玩，不過年青人玩電腦玩到出神入化，不妨試吓。呢一代人嘅電腦知識勝於我哋一代多多聲，如果佢哋能夠多在文字上下工夫，未來成就會更好。