內地航空界最近有單罕見新聞，一間叫鷹聯航空嘅民營航空公司，因為拖欠中航油嘅飛機油錢，俾中航油截油，本月17日凌晨開始，停喺石家莊嘅鷹聯飛機無油用，導致3班航班延遲起飛，共375名乘客滯留廿幾個鐘，等鷹聯找咗數，中航油先放油，幾班機先可以起飛。
內地報章話，05年中開業嘅鷹聯，長期拖欠中航油油錢，明明規定發票到達後10日內找數，但淨係拖欠中航油華北分公司嘅數期，最短50日，最長109日。鷹聯今次就拖咗60日數，一日油錢48萬元人民幣，60日就成2880萬元人民幣，數目都唔細。
講真，中航油都係做生意，如果間間航空公司都拖數，中航油遲早要執笠。民航總局對呢件事都有回應，話企業之間嘅商業糾紛，令消費者權益受損，咁係錯嘅。但華華就覺得，找唔找數都係其次，飛機嘅嘢，安全至上，航空公司最緊要入夠油先好飛。