根據CondeNastBridalMedia調查發現，美國人嘅結婚費用越嚟越高，一個婚禮平均要用兩萬八美金，差唔多22萬港銀。有啲人為咗慳錢，走去幫襯沃爾瑪（Wal-Mart）、Target或者Costco一類廉價商店買結婚蛋糕、戒指甚至結婚禮服。
有網友喺《MSNBC討論區》問：「女士們，你哋想唔想做個『慳家新娘』？」
留錢買股票好過
58cashcop話：「梗係想啦！如果唔慳，可能要借好多錢先結得成婚，結咗婚之後嘅財政狀況會變到好差，分分鐘搞到離婚。」Islandgirl441就話：「如果真心相愛，新人唔使買好貴嘅禮服，亦唔需要用3000美金買花、4000美金買結婚蛋糕咁浪費。」
organist話：「三四十年前嘅結婚儀式簡單得多，當時亦冇『婚禮規劃師』呢種新興服務，但我哋嘅父母同祖父母一樣婚姻幸福。計我話，結婚應慳得慳，將剩低嘅錢用嚟買股票、買樓，或者供仔女讀書好過。」
Messageitisabouttime反駁：「一世人通常只結一次婚，應該珍惜呢段美好時刻，舉行一個豪華嘅婚禮，咁樣新人同賓客都會覺得開心。」
沃爾瑪乘機宣傳
Target今年喺網站推出低至89.99美金（約702港元）嘅禮服，沃爾瑪亦喺7月7日呢個結婚好日主持7場婚禮，乘機推廣廉價嘅結婚用品。