揸住英超伯明翰29.9%嘅班主楊家誠（CarsonYeung），噚日正式以泓鋒國際主席身份開記招，咁啱呢隻股份又停牌，唔通係配股抽水？Carson死都唔答，只係話傾緊再購歐洲三至四個球會，而近期亦有好多賓架芬佬搵上門，擺明大把水喉唔使憂。
講番伯明翰往績係點，球迷心裏有數。Carson繼續力撐，勁旅非一天建造，佢個人鍾意有挑戰性，將呢支實力唔強嘅球隊，喺今年打造為英超嘅中堅分子，明年就會大事擴軍。佢話，暫時簽咗八名新球員，腹稿仲有五將，當中港隊有一名幸運兒，中國則有一至兩員，結果三個月內公佈。之不過，Carson點都唔透露使幾多錢組班，只係講睇好領隊布魯士，整隊人馬肯定可以踢場好波。
拆舊主場館搞地產？
雄心萬丈嘅Carson爆響口話，嚟緊會揼6億港紙，向伯明翰提出全購。佢仲再三催谷話，英超嘅大中華區概念好煞食，未來3個月會用兩億銀，喺中港兩地合共開設20間咖啡店同紀念品店，亦會成立多間足球學堂，包保送去英國受訓。Carson話，內地一胎政策，家長錫仔女錫到燶，花幾十萬學踢波都冇問題，講到前景非常之可觀。
Carson加多兩錢肉緊講，伯明翰嘅營運收入其實好和味，好似轉播費今年收益達4000萬英鎊，賣門券又收2000萬英鎊，或者拆咗個舊主場館搞地產㖭。佢仲話，只要有心發展伯明翰，唔好當球會淨係搵錢，當地球迷會好快接納華人班主。
[email protected]