《金手指》孫柏文喺6月15號嘅專欄，高調話要娶女股神王雅媛，原因係王小姐喺模擬炒股比賽中，兩個月將100萬變成2000萬。不過，專欄見報後文哥冇晒下文，事隔一個月，當大家以為文哥只係齋噏嘅時候，佢終於有行動。
上個禮拜三，文哥鼓起勇氣，打電話約呢位喺上海嚟香港中大讀書嘅女股神食晏。由於可能成為本港金融界今年最歷史性嘅時刻，華華厚住面皮都要做電燈膽，以下係佢哋當日部份對話嘅內容，睇完唔好打冷震。
（文：孫柏文 王：王雅媛）
文：你比我想像中瘦。
王：我出世有9磅㗎，今日可能件衫顯得瘦啲！
文：我出世都有8磅幾。
王：但你比我想像中肥，我估你31歲。
文：29咋！下個月就30歲，都好，你都係估我30頭。我嚟呢度之前，經過街口有個花檔，都有諗過買紮花送畀你，但又驚嚇親你，所以冇買。你覺得港女同上海女仔有乜分別？
王：香港女仔好Aggressive（進取），上海女仔就想嫁個好男人。
文：你係咪都咁諗？
王：細個就講feel，家吓就梗係想搵個有樓有車有錢，好正常啫！
文：咁你有冇男朋友？（講咗咁耐，終於入正題！）
王：可唔可以唔答？
文：咁香港係咪好多人追你？
王：冇乜！
文：你覺得上海男人同港男有乜唔同？
王：上海男人錫老婆啲，晚晚黃昏六點幾，就見到好多男人喺屋企煮飯，港男比較忙，好少咁做！
文：外判啦呢啲嘢。
王：我都想搵個識煮飯嘅另一半。
文：我都會煮，差在好唔好食！至於煮到幾多日，就要睇下櫃入面有幾多包即食麵！
王：但係我唔係好鍾意食即食麵！
文：我兩年冇入廚房，但我真係好有誠意㗎！（入戲肉嘞！）你有冇睇我嘅專欄？
王：都有嘅！
文：幾時開始？
王：咪就係你話要娶我個篇囉！我都有寫專欄㗎，你有冇睇呀？
文：係咩？我要search返嚟睇先，我承認我冇做功課就嚟食飯，我之後一定會睇番……
故事仲有冇下文？華華諗住開個盤，接受大家投注，你哋點睇？