筆者於7月11日以「次按危機恐蔓延」為題，之後國際信貸評級機構穆廸和標普相繼將次按債券列入負面觀察或調低評級；及後貝爾斯登透露屬下兩隻投資次按債券的對冲基金，一隻壽終正寢，另一隻僅剩下9%之價值；跟住聯儲局主席伯南克在向國會作證時承認，次按環節損失可能高達1,000億美元。如果次按無問題，美國10年聯邦債券孳息又怎會插穿5厘，收報4.95厘？
過往孳息一向下滑，市場便傳美國有機會減息，誘發美股上升。為甚麼上周五孳息急降，這美股卻跌個四腳朝天？假如還要解釋，便不是本欄長期忠實讀者了！
或有人認為，美股上周五急挫，是因為企業盈利欠理想所致。是嗎？那間企業可以令致美股「插水」？Google？Caterpillar？前者盈利確係比市場超高的估計為少，但並非業績倒退；後者在樓市唔妥期間一路升個不亦樂乎，呢次話業績欠佳乃建築機械滯銷喎!?
好了，既然刻意選擇好消息炒上，點解周四可以利用IBM一腳將股市踢上，翌日大隻如全球最大銀行花旗勁賺多18%，卻不敢放肆炒上？
上周冠一指「欲升之市何患無由」，上周五之急跌，理由何在？如果不是業績或利率，必定是與次按有關，不然標普500指數金融環節92隻股份中，為甚麼有87隻錄得下跌？美林、大摩、雷曼兄弟等，全部跌超過7%，可有啓示？次按真係冇事？佢話啫，你信唔信？