中環泄蘭街大概係全港最短嘅一條街，全長唔夠幾十呎，夾在皇后大道中二十號太平行與新世界大廈之間。呢條街有幾個攤檔，一個賣煙/糖（已轉賣衣服/手袋），一個配鑰匙，一個印章、一個賣果汁、一個賣花，最出名，最長嘅一個檔口就係賣英文雜誌嘅，在全盛時期，此報攤可以話乜雜誌都有，鄭大班未成為尊貴的議員之前，就經常來此幫襯，每逢佢講啲雜誌名，左丁山未聽過嘅話，鄭大班就話：「你去泄蘭街買本學吓嘢啦！」
雜誌檔老闆今年似乎老得快咗，最近兩三個月，唔見佢出現，啲雜誌亦冇埋，攤檔亦變成賣一啲唔值錢嘅雜物，再冇雜誌賣。究竟老闆（確係長者嚟㗎）嘅健康如何，令熟客懷念。去年左丁山有一次同佢傾偈，佢好感嘆咁話：「𠵱家少咗人買英文雜誌！」或者係嘅，中環嘅外籍人士數量確係少咗，街上雖然聽見好多英語，但都係（一望而知）啲海外回流嘅留學生/新一代人物講嘅，新一代可能好鍾意睇People，但對其他分類精細嘅雜誌就唔會有興趣，呢位阿伯嘅生意只會愈來愈少。
之所以想起呢位雜誌阿伯，皆因突然從舊報紙之中（IHT三月二十八日）睇到，超級名模NaomiCampbell在為社會服務令服役五天期間，每日由司機揸車送佢去紐約第三區衞生清潔部，落車後行路去門口之時，日日穿着不同時裝，配不同鞋/袋，好似行天橋咁款，等狗仔隊係咁影。做好人，益記者乎？非也，Naomi與一本時裝雜誌W簽咗約，准雜誌記者拍攝，做一個二十頁嘅時裝特輯，喺七月號出版。去邊度買呢本七月號W呢？左丁山想起泄蘭街雜誌檔，可惜已經人去雜誌空咯。
名人如ParisHilton，坐監有大把記者追住，名模如Naomi，去掃地都着衫着得靚過人，為社會服務變成為佢賺大錢，佢嘅代理人公司IMG話Naomi每日收費五萬至六萬美元，真係掃地掃得好有型！下次如果佢再用手機擲女傭，法官再判佢去掃街嘅話，佢會唔會講聲多謝？