今時今日，如果你話無睇過《溏心風暴》，分分鐘會被人懷疑你唔係香港人！怪唔得之有連鎖租碟店透露，自5月推出以來，《溏心》DVD出租率已佔榜首，成為劇王之王！除咗港劇，香港人視野廣闊，韓、台、日、美劇都有捧場客，就等小記將最熱煲的5大劇「共冶一爐」畀大家煲啦！
記者：趙珮倩、馮冠芝
攝影：伍慶泉、周旭文
鳴謝：DNAMusic&Video（22734532）
Top1：汁都撈埋溏心風暴（40集）
租碟店員話溏心播緊，已有大把人租，播完大家都未夠喉，漏睇１、２集都要租番嚟再睇，保持每星期租出3、4次，走勢凌厲！
賣鮑魚起家的「唐記」坐擁6億資產，富貴家族表面融洽，但有實無名的妾侍「細契」（關菊英飾）一直不甘現狀，致唐仁佳夫婦相繼死去，細契決定於唐家揭開爭產風暴！
高潮位：第21集細契趁大契去咗英國就作威作福，想趕絕得得地同莉姨，大契回來一句：「未登天子位，先置殺人刀！」簡直睇到拍大髀！
廁所位：大契過身，冇金句真係跌咗Watt，去到「沒有XX的日子第N日」真係超長氣！
睇乜星：老戲骨大晒冷，司棋姐、大公仔等，充份證明薑是老的辣！
總評分：★★★★★
Top2：新派監獄風雲《逃》（第1季22集）
HMV最高銷量劇王。高智商的年輕工程師米高，為救被屈謀殺的阿哥，竟打劫銀行博坐監，並將整個監獄藍圖紋在身上，密謀逃獄大計。米高一邊面對獄警阿頭的針對，又要拉攏有勢力的囚犯結盟，精神、肉體上飽受各種煎熬……
高潮位：逃獄過程，有伏線，有意外驚喜，越來越艱辛，緊張到手心標汗，跟少陣都甩。開行火1日煲4、5集，5日搞掂！
廁所位：米高與女主角SarahWayneCallies的愛情線唔吸引，趁佢兩位依泣，不妨瞌一瞌。
睇乜星：齋睇混合11國血統的型男主角WentworthMiller，精神晒﹗
總評分：★★★★囗
Top3：流星花園×浪漫滿屋=惡作劇之吻（30集）
衝動少女袁湘琴（林依晨飾）向天才美少年江直樹（鄭元暢飾）告白遭拒絕。湘琴、直樹卻機緣巧合住在同一個屋簷下，同居趣事+校園戀愛，集兩大愛情片之大成，難怪熱爆。
高潮位：第3次「惡作劇之吻」係大結局那集，當然掀起高潮。直樹得悉元豐（汪東城飾）要向湘琴求婚，才認清自己心意，雨中告白，大團圓結局！
廁所位：不知名配角打情罵俏位，不妨去淥個杯麵，吃飽繼續煲！
睇乜星：鄭元暢同江東城係新一代少女殺手，靚仔到爆！
總評分：★★★★
Top4：日版歲月風雲《華麗一族》（10集）
以70年代的製鐵業為背景，講述萬俵鐵平（木村拓哉飾）與父親的情仇。為了在商界求存，大介耍盡謀略，令鐵平成了陰謀下的犧牲品……
高潮位：幾乎人人以為鐵平是祖父強姦媳婦所生的孽種，結局卻……記得準備紙巾。
廁所位：日劇通病，節奏慢而文戲多！飛住煲，兩日極速煲完﹗
睇乜星：木村拓哉唔發姣仲靚仔咗，唔係唔睇呀！
總評分：★★★
Top5：說謊得人愛大話妹（13集）
周愉琳（李多海飾）為生存練得一手說謊技巧。有錢人薛國真（李東旭飾）知道她的「絕技」後，便要求她假扮自己表妹，以解爺爺心結。隨後兩人日久生情。
高潮位：第1集，大話妹愉琳大玩cosplay化身4個造型以避債，笑位不絕。
廁所位：此劇莫名地加插了一對中年男女感情戲，篇幅多到每集15分鐘，幾十歲人扮調皮有啲難頂，飛咗都跟到主線！
睇乜星：以「王的男人」一炮而紅的李準基搶晒主角鏡，劇中仲以佢中性樣貌大開玩笑，勁抵死！
總評分：★★
2大文火翻兜煲
Top6：醫生爆內幕白色巨塔（39集）
改編自同名小說，由醫生執筆，寫醫院的權力鬥爭，夠說服力！難怪租碟員說該店每月均約有6人問津。
蘇怡華（言承旭飾）是前途大好的年輕醫生，某天他會診的病人，竟是總統的女兒，其他醫生眼紅他這次黃金機會，繼而耍盡手段，展開一場爭權戰！
高潮位：第20集左右，怡華前往女友關欣家中，居然由關欣的舊愛明哲開門……
廁所位：冇追就全劇都係廁所位，皆因劇情環環入扣。
睇乜星：碎過餅碎的F4言承旭挑戰演技之作，結果「從前太過年輕」，如今依舊幼嫩。咪理啦，靚仔殺晒！
總評分：★★★★★
Top7：翻煲16次《衝上雲霄》（40集）
機師唐亦琛（吳鎮宇飾）在羅馬巧遇深信緣份的樂以珊（陳慧珊飾），二人火速撻着，卻因誤會而分開。同時，風流機長志雲（馬德鐘飾）對珊一見鍾情，珊決定與雲結婚，以為可以與琛畫上句號，卻原來是三角關係開始。
高潮位：馬德鐘車禍喪生，搞到陳慧珊思覺失調，成日見到馬德鐘出現，睇到心都寒。
廁所位：吳鎮宇同胡杏兒的感情線拖拖拉拉，加上兩個似兄妹多過戀人，sorry，投入唔到！
睇乜星：吳鎮宇、陳慧珊、胡杏兒、馬德鐘
總評分：★★★★
至新必煲
《逃》第二季
Fans成日問幾時出碟，7月尾有得煲喇﹗
《輪舞曲》
日劇版《無間道》，型男竹野內豐加上靚女崔智友，8月初出dvd，必煲﹗
街訪
Ady：「我鍾意煲港劇，《衝上雲霄》煲咗16次都唔厭，最吸引係吳鎮宇同陳慧珊的感情線，佢兩個真係做得好正！」
