上星期六晚，我車報員揸車入機場接朋友，當時大約凌晨12點，見未夠鐘所以將部車泊去客運大樓隔籬4號場。哈，點知兜到過去見到好多市區的士頂住入口，停車場嘅管理員仲耍晒手叫我掉頭走人！
最後擾攘一輪先接到個朋友，佢話畀我聽原來係班市區的士司機，為咗抗議機管局新上落客區安排，發動咗近300部的士堵塞機場，搞到好多旅客都好狼狽。唔少人呢頭上咗巴士諗住可以瞓到返屋企，點知Seat位都未坐熱就要落番車，仲要行一大段路去轉車。
撐的士但請勿太過火
車報員覺得，今次機管局嘅新上落客區安排真係攞嚟搞，Call咗的士嘅旅客要左行右行，先至上到車，拎住好多行李嘅人都唔知點算，今次一班的士司機嘅行動，我撐㗎！之但係毋須鋪鋪都玩咁激吖，上次玩完繁忙時間堵塞中環，今次又玩堵塞機場，係咪可以用較文明嘅手法去爭取？次次都係完事之後就話同市民SaySorry就諗住OK，第一次就得，第二次想過骨真係無咁易，再係咁盞搞到市民由撐你變憎你！