影迷送給偶像的禮物，可謂層出不窮。不過要數最窩心的禮物當然是由自己D.I.Y.先夠誠意。近排咁熱最好整嘢食嚟補充體力。高鈞賢（Matthew）亦有班忠實Fans，更曾於都市閒情送上親手炮製的壽司。為咗報答大家對佢的支持，決定同Fans齊齊去跟黃世賓師傅學煮餸！
記者：林佩婷
攝影：陳盛臣
烹飪指導：海景嘉福酒店海景軒中菜助理總廚
黃世賓師傅
包口袋豆腐用紅蘿蔔絲紮實袋口，睇吓邊個用最少而包得最實淨？
口袋豆腐
材料
0hr20min
份量：4人
布包豆腐3件、蘑菇/牛肚菌/雲耳各2至3隻、紅蘿蔔絲5條、蠔油2茶匙、糖1/2湯匙、雞湯1/4碗、鹽1/2茶匙、蒜茸1茶匙、油/生粉/紹酒各適量
做法
1.布包豆腐以大火炸3分鐘至金黃色，挖空備用。
2.將菇菌/蒜茸加入鑊中炒熟，加入蠔油/糖/紹酒調味。
3.菇菌釀入布包豆腐內，以蘿蔔絲綁好。
4.以大火蒸5分鐘，淋上用雞湯、生粉及鹽煮滾的醬汁即成。
貼士
Phoebe：「我見到豆腐炸完後要用熱水淋，點解呢？」
黃師傅：「好簡單啫！豆腐炸完凍咗會變硬好難包，所以要用水淋軟佢。」
鮮明蝦多士
材料
0hr15min
份量：4人
大蝦6隻、雞蛋6隻、方包4片、金華火腿1両、芫荽少許
做法
1.方包去皮後，切開二片成長方形。
2.大蝦去腸後，將蝦皮黑色的部分切除。
3.大蝦沾上蛋汁後放在方包上，並加上芫荽及金華火腿各1片。
4.用大火炸約1分鐘至中蝦熟透，盛起隔油後即成。
貼士
1.大蝦去皮要亁淨，否則完成後賣相不好。
2.用大火炸並睇實，一見多士變金黃即盛起。
奇異果羊仔片
材料
0hr7min
份量：4人
奇異果3個、羊仔片5両、蒜茸/生粉/油各少許
芡汁：鹽1/2茶匙、蠔油1/4茶匙、糖1/2茶匙、雞湯少許
做法
1.奇異果去皮切片，羊仔肉切片拌勻生粉。
2.羊仔肉泡油盛起。
3.將蒜茸加在鑊中炒香，加入羊仔肉炒熟，最後加奇異果及芡汁略炒即成。
貼士
1.奇異果切勿炒得太久，否則果肉會太腍。
2.羊仔肉煮至八成熟，否則口感變差。
人參煙肉醬茄子
材料
0hr15min
份量：4人
茄子1個、煙肉1両、豬肉碎4両、蜜餞人參片1両、生抽2茶匙、蠔油2茶匙、糖1/2湯匙、蒜茸1茶匙、油/葱花/生粉各適量
做法
1.豬肉碎以生粉、生抽及糖調味。
2.將茄子切開一半，在茄身切三角形並挑走茄肉，將肉碎釀入，以大火蒸7分鐘上碟。
3.以蠔油、蒜茸及糖煮成醬汁淋上碟。灑上煙肉碎、葱花及蜜餞人參片即成。
貼士
切割茄子不可以太深，否則蒸熟後會容易爛開。
Matthew：「我無估到個鍋咁重手，第一次拎差點掉手。將豬肉切成肉碎要好耐時間，點解唔用絞肉代替？」
黃師傅：「拎鍋唔可以單用手指力，要用手臂力量，而且用新鮮豬肉代替絞肉，口感會更好。只要先將豬肉切薄片，然後切成絲，最後切成細粒便可。」
七嘴八舌爭住問
從黃師傅身上偷師後，四位都意猶未盡，七嘴八舌發問其他問題：
Matthew：「估唔到切豬肉都要好有學問，個鍋比想像中重好多。」
黃師傅：「拎鍋唔可以單用手指力，要用手臂力量。」
Matthew：「我想問吓曾經喺外國中餐廳食到道奶油龍蝦，味道好特別，係唔係屬於中菜，主要用咩材料呢？」
黃師傅：「其實佢都算是中菜，主要用牛油、鮮奶製成。」
瑤瑤：「咁我煲湯成日瀉，原因又係咩呢？」
黃師傅：「好明顯係你落水太多，火太猛。」
Phoebe：「我想問點解次次煲親紫米都會黐埋一齊？」
黃師傅：「你只要將紫米煲熱再過冷河，就冇咁易黐埋喇！」
黃世賓師傅
入廚經驗：20年
最拿手菜式：魚翅、湯類
買定料：宋芝齡 明日同你煮餸
醬爆大生蠔
美國桶蠔5隻、洋葱/紅椒/青椒各1個、韓國辣椒醬/麥芽糖各1/4碗
五年根鮮人參炙肉串
A級西冷牛肉6安士、五年根鮮人參1條、秀珍菇15條、葱白2棵、韓國豉油/松子粉各少許
錦繡田園韓國黑豚肉沙律
沙律菜1包、黑豚肉4安士、紅/黃椒各2個、韓國麵豉醬1/3茶匙、芒果/雪梨各1/2個
石鍋人參雞燉翅
牙揀翅3両、四年亁人參1條、紅棗8粒、栗子8粒、白果4粒、鮑魚片1片、雞1/4隻