人事經理I為公司請新人，因為老闆話明要請大學精英，作重點培訓，可以出到人工近萬七銀一個月，所以招來唔少醒目仔女申請。經理I與老闆最後決定聘用一位口齒伶俐，話頭醒尾嘅新聞系畢業生，當然係女仔啦，𠵱家啲男生唔多識講嘢，面試時輸晒。
點知出咗聘書之後，叻女遲遲不覆，三催四請之後，先至收到回信簽署作實。但上工前三日，叻女來電郵，話好遺憾唔嚟上任咯。經理I為之氣結，大罵新一代毫無口齒，視搵工為兒戲，點知佢嘅姨甥女剛從美國名牌大學畢業回來，回應曰：「我哋要檢視多啲機會，擴闊經驗層面吖嘛，有更好嘅offer，梗係唔嚟你間公司啦！」經理I聽見更面燶。
新一代嘅心態如此，成年人咪又一樣，教授W嘅學部請副教授，系主任睇中一位四十歲左右嘅他校助理教授，一於挖角。大學嘅不成文規矩係如向其他大學請人，一定要升職一級先至得，否則冇乜人願意過檔。系主任與助理教授談判一輪之後，卒之簽約，並配合佢嘅研究特長與資歷，開辦新學期嘅課程。誰知一個月之後，助理教授話：「對唔住，我嘅校長極力挽留我，升職加薪，我唔過嚟咯！」系主任氣到一頭煙，知道畀人利用咗，最慘就係臨時臨急唔知點樣搵到人去教新課程。
一位生產力旺盛（出paper夠多之謂）嘅副教授，渡江去新界教書，升咗做教授，一年後，返回原校，與新界拜拜，呢次衣錦榮歸咯，原校請佢做講座教授㖭。你話如果唔轉工，跳一跳草裙舞嘅話，點會升得咁快呀。
搵工跳槽，升級加薪，係醒目仔女所為，但呢類人好難升到上頂級，長期（三十年）計算，未必有着數，試睇鄭海泉、柯清輝、彭玉榮等大賓架，根本未轉過工，錢乃驥係做到阿頭之後，因銀行被收購，先至轉職。轉工多，猶如不停買賣股票，止賺之後買過第二隻，唔轉工，似買中優質藍籌股，長期持有，賺得更多，大前提係選中優質公司。