本周熱話：全港首位公開整容的男士終於喺電視上演真人騷！身邊男生大多數反感，女生對其整容後樣貌毀譽參半！其實男人扮靚靚，靠一執靚鬚都可以食糊。因為呢樣係男人天生「本錢」，有啲白臉小生隨時因為多咗執鬚，令事業谷底反彈！《蘋果》訪問咗100位女生，結果絕大多數認為鬚根版碧咸最「索」最成熟，另外仲有人「欽點」咗幾個令人反感嘅濃鬚男，究竟邊個掂邊個唔掂？即睇！
記者：陳國輝
TOP1★碧咸 成熟穩重
講靚仔有邊個唔係第一時間諗起碧咸？原來佢留鬚一樣咁好睇，以前效力曼聯，嗰種白面書生Look頂多叫聲靚仔，𠵱家生埋三個囝囝，仲留到成面鬚根，直頭成熟兼穩重，佢都可謂新一代靚鬚男代表咯！
TOP2★尊尼特普 鬼馬頑皮
播完三輯《魔盜王》，男觀眾睇嘅當然係CG及動作特技，但女仔就講到明係睇靚仔尊尼特普，佢嗰二撇雞及下巴執鬚絕對係標記，就算角色性格鬼馬又頑皮，但一樣深得女生買飛入場支持。
TOP3★木村拓哉 不老傳說
年屆三十幾嘅木村，留二撇雞依然屬靚仔一名，仲以為食咗長生不老藥㖭！
TOP4★郭富城 頹廢爛佬
因拍攝《父子》關係，城城本住犧牲肌肉型男Look，以一臉頹廢及爛佬造型迎合劇情需要。點知塞翁失馬、焉知非福！呢執鬚唔單止令佢成為影帝，仲令好多女士Feel到Aaron成熟男人味嘅一面！
TOP5★梁朝偉 有內心戲
喺《無間道》裏面做卧底嘅偉仔，輕輕一笑已帶出其內心戲，簡直殺死人！
TOP6★劉德華 智慧型男
憑二撇雞及下巴留鬚形象，喺《墨攻》飾演一名精於守城嘅智者，入型入格！
反面教材
TOP1★奇洛李維斯 身價直插
憑《生死時速》及《廿二世紀殺人網絡》彈起嘅超級靚仔，自從留到成面鬚之後，女Fans大量流失，仲冇導演夠膽搵佢拍戲，身價直插谷底。
TOP2★SteveJobs 唔夠醒目
舊年留到成面鬍鬚嘅蘋果電腦主席，點睇都唔似走上潮流與科技尖端嘅大班，幸好介紹iPhone當日佢就剃亁淨晒，仲立即被眾潮人封為偶像。
TOP3★拉登 十惡不赦
睇怕都冇人敢學佢呢一款造型，鬍鬚既濃密又污糟。最慘學佢嘅人隨時俾全世界歧視為恐怖分子，無端端俾警察捉咗當壞人咁盤問，你話幾唔抵先！
