猜猜題：大家估吓一個全港最貴的漢堡包，可以夠買幾多個麥記漢堡包？50個？唔係！100個？唔係！150個？都唔係！答案係204個！一個價值$1,288的漢堡，用上日本最頂級的和牛及拖羅魚腩做餡，真係食得矜貴招積，抵我用全年食麥記的budget來豪一次﹗
記者：趙珮倩
攝影：伍慶泉
Model：Wilfred、Tracy、豐
千元漢堡大解構
層層都咁矜貴
麵包：酒店餅房日日新鮮出爐，以高密度V2000發粉再落重牛油做成，手指輕按，即刻彈回原位，咬落外皮脆內裏勁鬆軟，比一般漢堡包濕潤。
炸大蒜絲：以日本大蒜炸成，惹味香脆。
醬料：以日本芥辣根和忌廉芝士調製，芝士味濃芥辣唔攻鼻。
漢堡扒：以70%A4級鹿兒島日本和牛及30%頂級吞拿魚腩打成，未食已飄來肉香，入口夠滑夠juicy，完全冇渣﹗
配料：番茄又甜又多汁；生菜嗦嗦聲。
直擊誕生過程
香港人鍾意食漢堡，漢堡包熱長食長有，而且平有平食，豪有豪食，今次仲豪到要過千元一個，真係要出動刀叉慢慢享受！
香港洲際酒店TheLobbyLounge由8月1日起推出8款國際漢堡包，並由酒店5間餐廳：SPOON、NOBU、欣圖軒、THESTEAKHOUSE以及港畔餐廳，派出不同國籍的廚師攜手創作，當中有身價高達$1,288的和牛及拖羅魚腩漢堡，咁巴閉？馬上去片！
多國名菜薈萃
話明係由多個國家的大廚設計漢堡包，所以由肉餅、醬汁、配料、sidedish薯條等都精心考慮到每一個國家的菜式和食材，十足將傳統名菜幻化成層層叠的漢堡包。例如法國大廚會選用黑松露菌汁煎法國鴨肝配漢堡，印度大廚就會用咖喱羊肉加入幾十種香料做漢堡，至於中式代表則有北京填鴨配上傳統醬料；真係各有家鄉特色，而且件件漢堡直徑都有成4吋，足8安士，份量十足，勁過去鋸扒。當然去得洲際食，必然附送180度維港靚景！
目前酒店的roomservice已率先有得食這一系列漢堡包，而千元漢堡亦都有價有市，推出不久即賣出6個。據洲際公關姐姐透露，第一個食客更是我們的同胞，果然係祖國最強﹗
法式漢堡$230
另一矜貴組合，不過價錢就比較friendly。以澳洲和牛做漢堡，同樣一咬爆汁，配上黑松露菌汁煎法國鴨肝，別輕視那酸酸甜甜的番茄亁做的配料，小小一塊就能refresh口腔減低油膩感。
中式漢堡$170
以2/3鮮鴨肉加入1/3烤鴨肉剁成肉餅以乳豬汁烤焗，嫩滑唔嚡口，配以京葱及青瓜條做，係北京填鴨的另類吃法。
墨西哥式漢堡$160
以美國cajun紅椒粉醃製的雞肉漢堡，香辣惹味；芝士選用南美Jack芝士，伴埋墨西哥牛油果沙律醬，口感豐富。
泰式漢堡$160
這個蝦肉漢堡較罕有，以海中蝦切粒混入蝦膠，配以青檸葉、芫荽、葱、辣椒打成，蝦味突出，更食到彈彈的蝦仁。
印度式漢堡$170
用100%純羊肉做餡，落足印度咖喱粉、馬爾薩拉等香料，辣味唔弱，可蘸印度甜芒果醬或洋葱辣椒乳酪中和羶味。
香港洲際酒店
地址：尖沙嘴梳士巴利道18號
營業時間：7am-1am
電話：23132323
泊車優惠：2小時免費
