范太做多一年立法會主席就唔做，無後顧之憂講嘢放好多，直指民調顯示市民唔係幾滿意議員表現，議員工作仲有改善空間，佢提醒同僚，做議員最緊要係當選後有表現，如果當選後唔理選民，真係愧對選民。范太暗寸邊個，大家心裏有數，八方唔開名嘞。
前政務司司長肥龍之前鬧議員積極反對政府，范太認為呢番言論代表好多官員嘅睇法，主因係官員同議員缺乏互信，令官員覺得議員提意見係阻頭阻勢，刻意留難，佢認為雙方改善關係有好多好處，一來增加互信，甚至可能令全體議員有機會北上訪問。不過佢話北上要有天時、地理、人和，缺一不可，但相信中央會寬鬆處理，因為中國同國際關係越嚟越密切，亦唔可以永遠拒民主派於門外，所以反對派遲早有機會北上。