美國聯儲局主席伯南克成日話關注通脹風險，《華爾街日報》網上版最近搞個民意調查，睇吓邊樣生活必需品或消費品漲價，對網民影響最大。結果發現，有31%網民認為，能源漲價對佢哋影響最深，其次就係醫療保健。
快將退休嘅KenNaka好擔心醫療保健服務漲價，「我可以預測到大部份消費品將來嘅價格升幅，但冇人可以話你知，10年後醫療保險會加到幾多！」
最鍾意食嘢嘅rridgeley就話：「我見到鍾意食嘅嘢就買，話之佢貴定平，但我發現最近啲食物真係貴咗好多噃﹗」
樓價猛漲搞亂財務
jdfree覺得呢個調查嘅設計好有趣，因為好難揀出心水答案。佢話：「同住屋開支比，食品佔嘅比重唔係咁大，就算食物漲價，影響都唔大。至於能源漲價嘅影響，就要視乎住間屋有幾大、揸乜嘢車。講開房屋，家陣嘅樓價真係有好大個泡沫，有啲地區樓價貴到離晒譜，唔理租定買都要捱，我嘅財務策略正正俾樓價搞亂晒！」
rbenfield奇怪點解冇人覺得大學嘅學費加價好難頂？佢話：「家陣啲課程，間間學院差唔多，但學費就年年加一成，我覺得好荒謬！」