十個作家九個窮，喺香港全職寫作維生，搵到食真係一雙手數得晒。名成利就之後先出書就輕鬆得多，好似養和醫院副院長鄺國熙咁，最近出版小說《夕陽天使》，噚日喺書展講talk，佢好老實咁講，若果唔係做醫生搵埋大把，𠵱家都邊閒情逸致寫書？
本身係心臟科醫生嘅鄺院長平日都好風趣，噚日個talk直頭變咗棟篤笑咁，好多人讚外科醫生有把金刀喺手，搵到盤滿缽滿，佢都自嘲係「金刀鄺」，因為金刀冇鋼刀咁硬淨、鋒利，行內人指「金刀」醫生通常係形容啲老醫生，眼又矇、手又震，做手術時慢吞吞，所以佢叫大家千祈唔好隨便用「金刀」嚟讚醫生，事關即係寸人虛有其表、浪得虛名，收得貴又得個樣。
慨嘆撞唔到Coco
「金刀鄺」外表好後生，當佢話畀啲讀者知佢已經73歲，全場人頓時起哄「嘩嘩」聲，大家好關心佢有乜養生秘訣；佢話冇特別，只係每日跑步、打Golf，最新搞作係寫小說。佢解釋話年紀越大，同死亡就越接近，所以呢幾年諗咗好多同死有關嘅問題，佢又撞唔到Coco，冇得去尋歡，惟有匿喺屋企老作愛情小說。
贊成娼妓合法化
醫生寫愛情小說都幾出奇，金刀鄺話，好多人身邊老婆未必係自己嘅夢中情人，就算當住老婆面前，佢都係咁話；好多時兩個人喺埋一齊，只係因為大家喺合適時間、合適地方遇到對方，至於最愛是誰，大家就要問心嘞。問到「金刀鄺」夢中情人係邊位，佢當然冇講，不過就透露下一本小說構思，係有關殘疾人士同妓女，靈感係來自前排有單外國新聞，話有間天主教療養院，修女會搵妓女上門為殘障病人解決性需要。佢話人人都有性需要，否則Coco亦搵唔到食，所以佢贊成娼妓合法化。
名醫竟然咁敢言，又夠膽寫咁偏鋒嘅題材，相信好多人拭目以待。