「皇妃」早排同公仔箱高層個女「拖肥」合作拍劇，佢兩個出席宣傳活動嘅時候手拖手，好似感情好好咁，但其實皇妃咁做只係畀面高層，佢對拖肥極度嫌棄。
老手戥場
關仁聽聞公仔箱高層，為咗彌補自己個女嘅半桶水演技，唔單止搵好多演技派同佢個女合作，而且佔一半以上嘅場口，都要有個演技派戥住，等拖肥做唔掂嗰陣，有個老前輩幫手提點，結果皇妃同拖肥合作嗰陣，連拖肥去廁所，都幾乎要皇妃傍住。
搞搞吓皇妃拍嘅場口無端端多咗好多，結果皇妃越拍越覺得唔對路，忍唔住搵幕後講數，要求佢哋唔好再要佢做湊女婆，但講完之後，只係象徵式減咗少少咋。
Textby關仁
