著名心臟科醫生謝德富及陳曦齡的長子謝天承前日迎娶韓裔妻子金承美，分別在君悅酒店搞酒會及在四季酒店擺婚宴，到賀官紳名流多不勝數。其中賭王何鴻燊再度以他的去飲必然賀禮「三從四得」棟篤笑送給一對新人，更大讚一對新人像女兒超瓊及前女婿許晉亨般登對，問到有傳許晉亨與李嘉欣已註冊結婚，他則說：「呢啲我冇眼睇！」
著名心臟科醫生謝德富及陳曦齡長子謝天承與韓裔女友金承美前日舉行婚禮，由於謝醫生與本地官紳名流甚為友好，而婚宴場地四季酒店只能容納30多圍酒席，所以事前特別在君悅酒店舉行酒會，到賀名人絡繹不絕，其中賭王何鴻燊便於約6時多單拖到達。
再授三從四「得」
年屆85的賭王首先表現高強記憶力，他一見記者即流暢講述一對新人資料，他說：「新娘好靚，好少見一對咁靚嘅新人，兩個好絕，佢哋兩個都係art加computerscience嘅專家，又一齊喺BrownUniversity畢業，真係佳偶天成、好登對。我同謝德富講『你升級啦！𠵱家唔止係Dr.，係老爺㖭啦』。」問他一對新人是否登對如女兒超瓊及前女婿許晉亨？賭王說：「我睇都有，呢對真係好特別，太太有高麗血。」隨即問他前女婿許晉亨傳已與李嘉欣註冊結婚，他聽罷即說：「呢啲我冇眼睇。」
賭王席間又使出他去飲必備的「三從四得」棟篤笑送給一對新人，這個棟篤笑賭王說了不下數十遍，除了流利外，還有加插些少新內容，他說：「怕老婆先會發達，所以做丈夫一定要三從四『得』，第一要隨從，太太出街要好似跟尾狗咁死跟；第二要順從，太太如果發脾氣，要講『darling你啱晒』，『sweetheart冇錯㗎你』；第三要盲從，如果太太同人嗌交係佢錯，返嚟都要話佢啱晒。」
賭王續說：「四得呢第一要等得，太太鍾意扮靚，要等得唔好咁多聲氣，出街前髹灰水，劃眼線、眉、胭脂、口唇唔催得，一催從頭嚟過盞再等耐啲；第二要記得，太太生日、結婚周年紀念要記住，外母生日都要記得買禮物；第三要忍得，太太發𤷪𤺧一定唔好出聲；第四要捨得，獎勵太太買寶石、靚衫、手袋冇走雞，要寫定支票，蘇富比、佳士得要還數。」
自稱「每次一條心」
賭王還說：「我同新郎哥講，你肯三從四得，婚姻一定美滿，仲要學我咁桄郎樹一條心，今後只可望太太，其他女人唔好望。」記者即指賭王有多位太太，怎會是一條心？他說：「我每一次都係一條心。」最後動身離開，上車前還給了1,000元貼士予酒店的泊車員工。
採訪：梁錦雯
攝影：陳順禎
嘉賓小八卦：賭王復生避尷尬
賭王何鴻燊前晚沒有出席謝天承及金承美在四季酒店的婚宴，僅在君悅酒店的酒會「棟篤笑」一番便離去，反之賭王胞妹十姑娘兒子何東舜銘（左圖）及妻子陳復生（右圖）則有出席婚禮及婚宴，兩邊似夾過一樣，避過同場出現的尷尬場面。
最高蘋嬸
賭王玩懷舊，硬撐許晉亨同超瓊相襯，我蘋嬸都不妨趁呢個懷舊潮講埋一份，我就覺得亨亨同劉嘉玲幾襯，配埋黎姿亦都唔錯！
蘋果娛樂特派評述員蘋嬸
